25:492  sed  a  callida  unius  gentis  simulatione.  Quaeritur  tamen  quorsum  tam  anxie  laboraverint  in  re  minime  necessaria.  Videbimus  enim  alibi,  iussos  fuisse  Israelitas  omnibus  pacem  offerre,  quo  deinde  iustum  et  legitimum  bellum  indicerent.  Sed  quia  passim  vulgatum  erat,  eos  sedem  habitationis  quaerere  in  terra  Chanaan  (quod  assequi  non  poterant  nisi  profligatis  incolis)  constituunt  Gibeonitae  non  aliter  ad  misericordiam  posse  flecti  quam  fallacia  delusos:  quia  nunquam  sponte  et  scientes  passi  fuissent  quam  invaserant  terram  ab  aliis  occupari.  Imo  quia  praeceptum  de  omnibus  perdendis  innotuerat,  haec  necessitas  eos  ad  astutiam  compulit,  quia  spes  omnis  salutis  impetrandae  adempta  erat.  Et  hac  etiam  ratione  paulo  post  fraudem  necessitate  expressam  deprecantur.  Exoritur  tamen  hic  quaestio  :  quia  mox  excipiunt  Israelitae  sibi  non  esse  liberum  pacisci  cum  gentibus  Chanaan,  sed  omnes  sibi  esse  exterminandas.  Haec  certe  duo  inter  se  discrepant:  ad  deditionem  hortari:  neque  supplices  et  voluntarios  admittere.  Verum  quamvis  Deus  pro  more  et  usu  consueto  iura  belli  servari  voluerit,  atque  ita  sub  conditione  pacem  offerri  si  modo  cederent:  tentari  duntaxat  voluit  gentium  illarum  animos  :  ut  propria  obstinatione  accerserent  sibi  exitium:  populo  autem  israelitico  denunciatum  erat,  ut  funditus  eas  perderet:  hinc  merito  sumitur  haec  sententia,  non  posse  tolerari  qui  in  terra  Chanaan  habitant,  quibuscum  foedus  percutere  nefas  erat.  Ac  utrumque  diserte  postea  exprimetur,  omnes  pertinaciter  bellum  gessisse,  quia  Dei  sententia  fuerat,  ut  indurarentur  corda  eorum  et  perirent.  Unde  colligere  licuit,  servari  non  posse  qui  morti  addicti  erant.  Si  quis  obiiciat,  Gibeonitas,  quum  pacem  ultro  appeterent,  fuisse  igitur  exemptos,  respondeo:  Israelitas  non  expendere  in  praesentia  solennem  illum  ritum,  qui  effectu  carebat:  sed  promissionem  solam  cum  mandato  Dei  arripere.  Ita  fit  ut  nullam  spem  residuam  faciant:  quia  simpliciter  et  praecise  mandatum  fuerat  ut  omnibus  ad  unum  interfectis,  terram  purgarent,  et  succederent  in  locum  mortuorum.  6.  Perrexerunt  ergo.  Dixi  summo  iure  evanidum  et  irritum  fuisse  eiusmodi  foedus.  Quid  enim  dum  fiunt  voti  compotes  adipiscuntur,  nisi  ut  salvi  sint  si  ex  remota  et  longinqua  orbi  splaga  venerint?  Et  quo  saepius  idem  mendacium  inculcant,  pactionem  magis  ac  magis  abrogant  dolo  elicitam,  quando  nonnisi  in  haec  verba  concipitur,  ne  quid  molestiae  afferant  Israelitae  populo  alieno  et  procul  dissito:  praesertim  quum  omnes  incolas  terrae  Chanaan  nominatim  excludant  Israelitae.  Nullum  igitur  ex  fraude  pretium  obtingere  illis  debuit.  Nihilo  etiam  magis  eos  iuvat,  quod  fallaci  nominis  Dei  praetextu  obnubilant  mentem  Iosue.  Obtendunt  se  venisse  in  nomine  Dei:  ac  si  profiterentur  se  Deo  dare