25:491  491  COMMENTARIUS  IN  IOSUE  OAR  IX.  492  attulissent.  Certum  ergo  est,  earum  desidia  et  torpore  Israelitas  factos  fuisse  expeditiores.  Spatium  enim  datum  interea  fuit,  quo  se  ipsos  colligerent:  et  qui  solis  hostium  nominibus  fuissent  turbati  ad  eos  excipiendos  se  per  otium  comparant.  Ita  quamvis  reprobi  nihil  non  moliri  cupiant  ad  perdendam  ecclesiam  :  Deus  tamen  ut  nocendi  facultatem  adimat,  dissipat  et  pervertit  eorum  consilia:  imo  spiritum  vindemiat.  Ab  altera  parte  se  prodit  furiosa  eorum  audacia,  quod  manifesto  miraculo  non  flectuntur,  quo  minus  inexpugnabili  Dei  potentiae  se  tanquam  rabidae  belluae  opponant.  Fama  ad  eos  allata  fuit  de  expugnatione  urbis  Iericho.  An  hominum  consilio  vel  industria?  an  conatu?  an  machinis  eversa  fuerat?  Imo  sponte  muri  corruerant.  Qua  igitur  fiducia  ad  arma  contra  coelum  suscipienda  conspirant?  3.  Habitatores  vero  Gibeon.  Soli  habitatores  Gibeon  repudiato  bellandi  consilio,  ad  fraudem  animos  applicant,  ut  praetextu  longae  distantiae  pacem  impetrent.  Porro  odiosum  erat  apud  vicinos  id  tentare:  quia  id  erat  quodammodo  facere  discessionem,  ianuam  aperire  Israelitis,  vires  sociorum  diminuere.  Etsi  autem  reprehensione  digna  fuit  stulta  credulitas  Iosue  et  procerum,  quibus  nulla  religio  fuit,  re  nondum  comperta  inconsiderate  pacisci:  Deus  tamen  qui  educere  solet  lucem  e  tenebris,  id  vertit  suis  in  bonum:  quia  relaxatio  illis  data  fuit,  ut  in  solo  pacato  consisterent.  Recte  quidem  et  prudenter  Gibeonitae,  dum  sibi  quidvis  potius  ferendum  statuunt,  quam  frustra  resistendo,  magis  Deum  in  se  provocare.  Sed  fraude  et  illicitis  artibus  circumvenire  quos  cupiunt  habere  propitios,  non  minus  absurdum  et  ridiculum,  quam  rationi  et  aequitati  adversum  fuit.  Quae  enim  potuit  esse  foederis  stabilitas,  quod  nonnisi  crassa  fraude  subnixum  erat?  Se  alienigenas  ex  regione  procul  dissita  venisse  simulant.  Cum  larvis  ergo  paciscitur  Iosue:  nec  quidquam  obligationis  contrahit,  nisi  secundum  eorum  verba.  Ita  calliditas  qua  se  insinuabant,  nihil  prodesse  debuit.  Verum  ut  maior  adhuc  vigebat  inter  homines  integritas:  satis  illis  fuit  vel  errore  extortum  iusiurandum:  quod  certo  persuasi  erant  populum  Israel  non  violaturum.  Quod  dicitur,  ipsos  etiam  egisse  callide,  perperam  referunt  ad  stratagema,  quo  usus  fuerat  Iosue  in  fallendis  civibus  Ai:  nec  minus  inscite  alii  trahunt  ad  tempus  Iacob,  cuius  filii  Levi  et  Simeon  fraudulenter  oppresserant  Sichimitas.  Atqui  potius  subest  antithesis  inter  hostilem  apparatum  regum,  et  occultam  vafritiem  qua  ipsi  adorti  sunt  Iosue.  Postquam  ergo  dictum  fuit  alios  coniurasse  ut  simul  descenderent  in  apertum  certamen:  subiicitur  Gibeonitarum  dolus:  ideoque  sensus  est,  negotium  oblatum  fuisse  ipsi  Iosue  non  tantum  a  professis  hostibus,  qui  se  ad  pugnandum  congregaverant: