9:490  aetatis  plene  adultae  Christi  (Ephes.  4,  13).  Nec  pluribus  verbis  opus  est  ad  hoc  probandum.  Si  enim  fide  habitat  Christus  in  nobis,  certum  est  secundum  fidei  incrementa  quodammodo  adolescere.  Obiicit  Heshusius:  Quid  igitur  infanti  recens  baptizato  fiet,  si  non  gustata  coena  decedere  ex  hac  vita  contingat?  Quasi  vero  lege  aliqua,  vel  necessitate  Deum  constringam,  ne  operetur  quoties  visum  est  absque  coenae  adminiculo.  Illud  enim  Augustini  retineo:  Invisibilem  sanctificationem  sine  visibili  signo  esse  posse:  sicuti  rursus  visibile  signum  sine  vera  sanctificatione.  Nec  sane  quidquam  Ioanni  Baptistae  obfuit,  nunquam  fuisse  ad  coenam  admissum,  quin  Christum  possideret.  Tantum  doceo  sic  gradatim  nos  pervenire  ad  Christi  communicationem,  ut  non  frustra  coenam  ipse  evangelio  et  baptismo  addiderit.  Quamvis  ergo  ex  hac  vita  multos  eripiat  Deus  non  aetate  modo,  sed  etiam  fide  pueros,  scintilla  tamen  una  spiritus  sufficiet  illis  ad  vitam,  quae  absorbeat  quod  in  ipsis  mortale  est:  ut  alibi  tradit  idem  Paulus  (Rom.  8,  17).  Cuius  tamen  autoritas  vereor  in  Heshusio  sordeat,  quando  reum  putidi  et  impii,  ut  vocat,  dogmatis  facere  non  dubitat:  sub  meo  quidem  nomine.  Sed  quid  refert,  si  impietas,  cuius  me  insimulat,  in  verbis  Pauli  palam  deprehenditur?  Salvum  igitur  manet  quod  doceo,  Christi  communicationem  [pag.  49]  secundum  suos  gradus,  tam  in  coena  quam  extra  eius  usum,  nobis  conferri.  Porro  quum  toti  mundo  plus  quam  notum  esse  putarem,  consensu  veteris  ecclesiae  doctrinam  nostram  clare  probari,  causam  hanc  retexit  Heshusius,  et  quosdam  vetustos  scriptores,  ut  confligant  nobiscum,  quasi  erroris  sui  suffragatores  advocat.  Equidem  hactenus  hoc  argumentum  ex  professo  tractandum  non  suscepi:  quia  nolebam  actum  agere.  Primus  hoc  Oecolampadius  accurate  ac  dextre  praestitit:  ut  evidenter  monstraret  commentum  localis  praesentiae  veteri  ecclesiae  fuisse  incognitum.  Successit  Bullingerus,  qui  eadem  felicitate  peregit  has  partes.  Cumulum  addidit  Petrus  Martyr,  ut  nihil  prorsus  desiderari  queat1).  Quantum  tamen  coegit  importunitas  Westphali,  videor  in  probando  antiquitatis  consensu  satisfecisse  sanis  et  integris  lectoribus:  imo  et  contentiosis  obstructum  esse  os  debuit.  Quoniam  vero,  quamlibet  solidis  rationibus  victi  sint,  surdis  canitur  fabula,  brevi  dilutione  contentus  ero,  ex  qua  cognoscant  lectores  non  minus  aridum  et  futilem  esse  hunc  novum  antiquarium,  quam  fuit  Westphalus.  Mirum  autem,  quum  Ioannis  Damasceni  et  Theophylacti  testimoniis  eum  uti  pudeat,  vocare  tamen  non  postremos  in  scriptoribus  ecclesiasticis.  Atqui  plus  doctrinae  ac  pietatis  re-  1)  Notitiam  bibliographicam  accuratiorem  suppeditabit  Walchii  Bibi  theol  IL  424  seqq.