5:490  Et  merito.  Si  quis  enim  illis  approbare  se  velit,  is  Christi  servus  esse  non  potest.  Nec  vero  durum  videatur,  eos  contemnere,  de  quibus  alibi  scriptum  est:  Omnis  plantatio  a  patre  coelesti  non  plantata  eradicabitur.  Ad  haec  reformatione  ecclesiarum  secundum  Dei  verbum  instituta,  etiam  si  non  obtineant  Germani,  ut  ab  aliis  nationibus  communi  consensu  quamprimum  recipiatur,  exemplum  tamen  praeclarum  edent  universo  nomini  christiano  cumprimis  salutare,  hoc  certe  tempore  necessarium,  nullis  vero  [fol.  30]  nisi  antichristianis  exitiale.  Nam  quid  obiicitur  monstrosam  fore  rem,  si  separatim  a  reliquis  novam  ecclesiae  formam  instituant,  id  nullo  negotio  refellitur.  Monstrum  est  quod  contra  naturae  legem  vitium  suboritur.  In  corpore  igitur  humano,  quod  membris  omnibus  foedum  sit  ac  deforme,  si  pars  una  ad  rectum  naturae  ordinem  restituta  fuerit,  in  eo  quid  obsecro  erit  monstri?  Nam  si  membris  omnibus  apta  compositione  inter  se  cohaerentibus  unum  aliquod  a  legitima  sede  dimoveas,  id  vero  monstrosum  foret.  Ad  hunc  modum  in  civitate,  quae  abiecta  omni  moderatione,  fractis  diruptisque  legum  vinculis,  tota  se  ad  insolentiam  probrosamque  vivendi  licentiam  prostituerit,  si  pauci  aliqui  se  a  communi  depravatione  recipiant,  vitamque  legibus  conforment,  utros  potius  monstrosos  dicemus?  eosne  qui  ad  legitimam  civitatis  formam  sunt  compositi,  utcunque  pauci  sint,  an  qui  multitudine  freti,  nihil  stati,  nihil  moderati,  nihil  ordinati  habent,  quibus  rebus  constat  civitatis  et  res  et  nomen?  Quae  igitur  ratio  est,  si  gens  una  se  a  communi  corruptione  receperit:  si  aliae  non  protinus  exemplum  eius  sequantur,  diversitatem  in  eo  ceu  horribile  monstrum  abominari  et  anxie  formidare?  Quod  autem  ecclesiae  membra  plus  quam  portentosa  defectione  a  capite  suo  quodammodo  divulsa  sunt,  m  eo  nihil  monstri  horrere  ?  scilicet  exsecrabile  portentum  Germani  edemus,  si  reliquas  gentes  adducere  non  poterimus,  ut  ad  eam  a  qua  nobiscum  deviarunt  evangelii  veritatem  nobiscum  revertantur.  Non  erit  autem  portento  deputandum,  si  illae,  quod  Deus  avertat,  propositis  melioribus  exemplis  animum  in  sua  pravitate  obstinaverint.  Sed  species  ipsas  propius  intueri  operae  pretium  est.  Monstrum  erit,  si  Germani  nullum  habeant  sacrum  conventum  in  quo  non  secundum  apostolicum  institutum  vel  lectionem,  vel  doctrinam,  vel  exhortationem  adhibeant,  qua  aedificetur  populus  ad  pietatem.  At  vero  quod  passim  in  omnibus  regionibus,  ubi  invocatur  nomen  Christi,  nihil  quam  non  intellectae  caeremoniae,  eaeque  vel  in  totum  absurdae,  vel  multis  modis  depravatae,  omnes  ad  impium  quaestum  prostitutae  exhibentur,  nulla  autem,  vel  rarissima  auditur  lectio,  aut  exhortatio,  ex  cuius  intelligentia  populus  fructum  aliquem  recipiat;  et  si  quid  interdum  vel  a  fatuis  monachis,