39:490  ipsorum  animos  deiicere,  ideo  propheta  occurrit,  et  refert  eorum  voces.  Dicit  ergo  quasi  ipsorum  persona.  Nos  sumus  confusi,  quia  audivimus  opprobrium,  hoc  est,  quia  vexati  sumus  hostium  nostrorum  probris.  Neque  enim  dubium  est  quin  Chaldaei  multas  contumelias  evomuerint  contra  miserum  illum  populum.  Nam  et  superbia  et  crudelitas  illorum  talis  erat,  ut  insultarent  Iudaeis,  praesertim  quum  prorsus  diversa  esset  religio.  Quum  ergo  toties  verberatae  essent  multis  probris  aures  populi,  ideo  recitat  propheta  eos  aliquid  habere  causae  secundum  carnem,  cur  vix  sperare  audeant  reditum.  Eodem  sensu  adiungit,  Ignominia  cooperuit  facies  nostras,  quia  venerunt  extranei  in  sanctuaria  Iehovae.  Nam  haec  unica  erat  gloria  electi  populi,  habere  templum,  ubi  Deum  non  frustra  invocarent.  Erat  enim  illa  promissio  instar  inaestimabilis  thesauri,  Ego  in  medio  vestri  habito,  haec  requies  mea,  hic  habitabo.  Quum  ergo  Deus  sedem  illam  ac  domicilium  dignatus  fuisset  sibi  eligere  in  mundo,  haec,  quemadmodum  iam  dixi,  praecipua  fuit  dignitas  electi  populi.  Quum  vero  templum  fuit  eversum,  quid  amplius  restabat?  perinde  erat  ac  si  religio  prorsus  esset  collapsa:  deinde  ac  si  Deus  illis  relictis  alio  migrasset  :  denique  omnis  spes  divini  auxilii  et  salutis  fuisset  illis  ablata.  Nunc  ergo  tenemus  cur  propheta  ex  communi  populi  sensu  ita  loquatur,  nempe  opertos  esse  ignominia,  quoniam  venerant  extranei  in  Dei  sanctuaria,  hoc  est,  polluta  erat  illa  sedes,  quam  Deus  sibi  elegerat.  Sanctuaria  nominat  plurali  numero,  quoniam  templum  habuit  tres  partes,  sicuti  tabernaculum.  Fuit  enim  vestibulum,  vel  atrium,  ubi  immolabant  victimas:  fuit  deinde  sanctum,  et  fuit  sanctum  sanctorum,  quod  erat  adytum  interius.  Hoc  igitur  respectu  dicit  sanctuaria  domus  Dei  fuisse  possessa  ab  extraneis.  Erat  enim  illa  foeda  et  pudenda  pollutio,  quum  extranei  templum  Dei  tenerent,  neque  enim  admittebatur  vulgus  ipsum:  et  quamvis  omnes  essent  sacer  Dei  populus,  solis  tamen  sacerdotibus  licuit  templum  ingredi.  Fuit  igitur  haec  horrenda  templi  profanatio:  quum  hostes  violenter  et  ignominiae  causa  illuc  ingressi  essent.  Sed  per  ingressum,  ruinam  etiam  significat  propheta.  Quum  ergo  violatum  esset  templum  Dei,  quid  populo  residuum  fuit,  nisi  ut  desperaret?  Haec  est  gloria  vestra  coram  omnibus  populis,  dicebat  Moses.  Quis  enim  populus  tam  nobilis,  quae  gens  tam  inclyta,  ut  habeat  deos  ita  appropinquantes  sibi?  Quum  ergo  Deus  familiariter  habitare  destitit  apud  Iudaeos,  concidit  tota  eorum  dignitas,  et  obruti  fuerunt  ignominia.  Postquam  autem  has  querimonias  propheta  retulit,  subiicit  mox  hanc  consolationem:  52.  Propterea  ecce  dies  veniunt,  dicit  Iehovah,  et  visitabo  super  sculptilia  eius,  et  in  tota  terra  eius