32:490  Dieu  nous  a  prevenu  et  anticipe,  et  qu'il  nous  a  declare  que  la  reigle  de  cheminer  droit  est  de  suyvre  ses  commandemens:  et  qu'il  n'a  point  fait  cela  comme  en  passant*  mais  qu'il  y  a  insiste  tant  qu'il  luy  estoit  possible.  Tiercement,  que  par  ce  moyenla,  il  nous  a  declare  quel  est  son  amour  envers  nous,  et  quelle  solicitude  il  a  de  nostre  bien  et  de  nostre  vie.  Or  David  adiouste,  A  la  miene  volonte  que  mes  voyes  soyent  adressees  a  garder  tes  statuts.  Yci  David  se  pieque,  et  monstre  le  desir  qu'il  a  de  parvenir  a  cest  heur  et  a  ceste  felicite  dont  il  avoit  fait  mention  ci  dessus.  Et  il  nous  faut  bien  observer  cest  ordre,  car  ce  n'est  point  assez  que  nous  cognoissions  ou  gist  la  felicite  des  hommes,  et  quel  est  le  chemin  d'y  venir,  comme  Dieu  nous  Ta  ordonne:  mais  il  nous  faut  venir  a  nous.  Il  faut  qu'un  chacun  pense  a  soy.  Comment  en  es-tu?  Puis  que  ton  Dieu  est  si  bening  qu'il  te  cerche,  qu'il  ne  demande  sinon  que  tu  viennes  a  luy,  fautil  que  tu  ne  bouges?  que  tu  sois  comme  un  tronc  de  bois,  comme  une  creature  insensible?  que  tu  ne  sois  point  esmeu  d'une  telle  grace  que  ton  Dieu  te  monstre  et  te  fait  sentir?  Voyla  ce  que  David  nous  a  voulu  enseigner  en  ce  verset,  Que  mes  voyes  soyent  adressees  a  garder  tes  commandemens.  Quand  il  parle  de  ses  voyes,  il  entend  toutes  les  parties  de  sa  vie,  car  la  vie  humaine  est  appellee  chemin.  Et  non  sans  cause,  car  toutes  nos  pensees,  nos  affections,  sont  comme  voyes,  et  comme  nos  pas.  Or  il  dit,  Que  mes  voyes  soyent  adressees  a  garder  tes  commandemens.  En  cela  il  monstre,  que  l'homme  fidele,  apres  avoir  cognu  ceste  misericorde  que  Dieu  nous  a  faite  en  guidant  nostre  vie,  doit  entrer  en  soy-mesme,  et  doit  estimer  qu'il  n'y  a  ne  raison  ne  prudence  en  luy  pour  se  scavoir  gouverner:  mais  que  le  tout  procede  de  la  bonne  volonte  de  Dieu.  Voyant  donc  que  nous  sommes  tant  enclins  a  nous  esgarer  ca  et  la,  a  cause  de  ceste  folle  presomption  et  vaine  confiance  que  nous  avons  de  nostre  sagesse,  prenons  le  remede  tel  que  Dieu  nous  l'ordonne:  c'est  ascavoir,  que  renoncans  a  nousmesmes,  nous  mettions  sous  le  pied  ceste  raison  charnelle  qui  nous  decoit:  que  nous  aneantissions  toutes  nos  cupiditez  et  meschantes  affections,  afin  que  Dieu  seul  domine,  et  que  nostre  vie  soit  conduite  selon  sa  Loy.  Or  il  s'ensuit,  Ie  ne  seray  point  confus,  quand  i'auray  regarde  a  tous  tes  mandemens.  Yci  David  se  conferme  en  la  doctrine  prochaine  :  car  il  monstre  quel  est  le  but  auquel  il  pretend.  Seigneur  (dit-il)  quand  tu  m'auras  fait  ce  bien  que  ie  soye  adresse  selon  ta  Parole,  ie  ne  seray  confus  en  rien.  Or  quand  David  a  un  tel  desir,  il  monstre  bien  qu'il  faut  que  l'homme  se  solicite  et  s'efforce,  ou  iamais  il  n'obeira  a  Dieu,  veu  qu'il  y  a  tant  de  contradic-