54:49  49  SUR  LA  SECONDE  A  TIMOTHEE.  50  bien  desservi  que  Dieu  les  cherchast,  notamment  sainct  Paul,  pour  mieux  exclure  tout  ce  que  les  hommes  se  peuvent  attribuer,  dit  Propos  et  grace.  Or  cela  emporte  autant  comme  s'il  disoit  propos  gratuit.  C'est  doncques  pour  abbatre  toutes  nos  oeuvres,  afin  que  nous  ne  soyons  plus  si  fols  ni  obstinez,  de  penser  que  Dieu  nous  ait  choisis  pource  qu'il  y  avoit  quelque  chose  en  nous  digne  de  cela:  rien.  Mais  cognoissons  que  Dieu  n'est  point  sorti  de  soy  mesme  quand  ii  nous  a  eleus  a  salut.  Car  il  voyoit  qu'il  n'y  a  que  perdition  en  nous:  il  s'est  donc  contente  de  sa  pure  grace,  et  de  sa  misericorde  infinie,  que  contemplant  nos  miseres,  il  nous  a  voulu  secourir,  encores  que  nous  n'en  fussions  pas  dignes.  Et  pour  plus  grande  confirmation  de  cela,  sainct  Paul  dit  que  ceste  grace  nous  a  este  donnee  devant  tous  temps.  Et  en  ceci  voyons-nous  comme  les  hommes  sont  despourveus  de  sens,  quand  ils  se  veulent  faire  valoir,  et  qu'ils  se  font  a  croire  qu'ils  sont  cause  de  leur  salut,  et  qu'ils  ont  anticipe  la  bonte  de  Dieu,  ou  qu'ils  sont  venus  au  devant  de  luy.  Dont  est-ce  que  depend  nostre  salut?  N'est-ce  point  de  l'election  eternelle?  Dieu  nous  a  eleus  devant  que  nous  fussions.  Et  que  pouvions-nous  faire  alors?  Nous  estions  bien  habiles,  nous  estions  bien  disposez  pour  venir  a  Dieu.  Nous  voyons  mesmes  que  nostre  salut  ne  commence  point  depuis  que  nous  avons  cognoissance  et  discretion,  depuis  que  nous  pouvons  avoir  quelque  bon  desir:  nostre  salut  (di-ie)  ne  commence  point  la,  mais  il  est  fonde  en  l'election  eternelle  de  Dieu,  qui  estoit  devant  que  tout  le  monde  fust  cree.  Que  pouvions-nous  alors?  Avions-nous  le  moyen  de  nous  avancer?  Pouvions-nous  donner  occasion  a  Dieu  qu'il  nous  appellast  a  soy,  et  qu'il  nous  separast  du  reste  du  monde?  Ne  faut-il  pas  doncques  qu'il  y  ait  une  merveilleuse  yvrongnerie  en  nous,  quand  nous  cuidons  avoir  quelque  dignite,  que  nous  cuidons  exalter  nos  merites  pour  obscurcir  la  grace  de  Dieu,  et  que  nous  voulons  aussi  estre  preparez  pour  avoir  acces  a  luy  par  nos  merites?  Retenons  bien  doncques  a  quel  propos  sainct  Paul  a  ici  mis  l'election  de  Dieu,  disant,  que  la  grace  nous  a  este  donnee  devant  tous  temps.  Mais  par  cela  nous  avons  un  bon  advertissement:  c'est  ascavoir  que  ceux  qui  cuident  abolir  la  doctrine  de  l'election  de  Dieu,  aneantissent  entant  qu'en  eux  est  le  salut  du  monde,  en  sorte  que  le  diable  n'a  point  de  supposts  plus  propres  pour  effacer  la  vertu  du  sang  de  nostre  Seigneur  Iesus  Christ,  pour  mettre  tout  en  confusion,  pour  ruiner  l'Evangile,  et  mesmes  pour  exterminer  la  bonte  de  Dieu  de  la  memoire  des  hommes:  le  diable  n'a  point  de  plus  propres  supposts  que  ceux  qui  combatent  contre  la  predestination,  et  qui  ne  peuvent  souffrir  en  leur  rage  diabolique  qu'il  en  soit  parle,  et  que  ce  ines-  Calvini  opera.  Vol.  LIV.