41:49  49  IN  DANIELEM.  CAP.  VII.  50  sed  plurium.  Angelus  enim  postea  dicet  cornua  decem  esse  decem  reges:  non  quod  fuerint  tot  reges  Romae,  quemadmodum  stulte  Iudaei  somniant,  qui  sunt  rerum  omnium  imperiti:  sed  propheta  hic  discernit  monarchiam  quartam  a  reliquis,  ac  si  diceret  fore  populare  imperium,  cui  non  unus  rex  praeerit,  sed  quod  erit  divisum  in  plura  capita.  Nam  vel  sortiebantur  inter  se  provincias,  vel  paciscebantur  inter  se,  ut  hic  praeesset  Macedoniae:  alter  vero  Ciciliam,  alter  Syriam  teneret.  Sic  videmus  fuisse  plura  regna.  Nam  quod  ad  numerum  denarium  spectat,  scimus  hanc  esse  frequentem  et  tritam  loquendi  formam  m  scriptura,  ut  decem  significent  plures.  Ubi  ergo  pluralitas  notatur,  illic  ponitur  numerus  denarius.  Sic  quum  propheta  refert  fuisse  quartae  bestiae  decem  cornua,  intelligit  fuisse  complures  provincias  sic  divisas  ut  quisque  vel  proconsul  vel  praetor  esset  similis  regi.  Nam  dabatur  illis  summum  imperium,  perinde  ac  in  urbe  et  Italia  consulibus.  Poterat  quidem  etiam  in  provincias  consul  scribere  et  mandare  quidquid  visum  fuerat,  deinde  in  gradum  honoris  evehere  favoris  et  amicitiae  gratia  quos  volebat:  sed  quisque  ex  praetoribus  et  proconsulibus,  prout  adeptus  erat  provinciam,  erat  illic  instar  regis:  quia  summa  dabatur  omnibus  potestas  vitae  et  necis*  in  omnes  subditos.  Nec  est  hic  anxie  laborandum  in  numero,  quemadmodum  iam  attigimus.  Et  qui  recensent  romanas  provincias,  longe  falluntur.  Omittunt  enim  praecipuas:  Hispaniam  faciunt  provinciam  unam,  et  tamen  scimus  semper  fuisse  duas:  Galliam  etiam  non  dividunt,  scimus  tamen  semper  Galliis  praefuisse  duos  proconsules,  excepto  Iulio  Caesare,  qui  utramque  obtinuit.  Sic  etiam  de  Graecia  loquuntur:  et  tamen  nullus  fuit  vel  proconsul,  vel  praetor,  qui  mitteretur  in  Graeciam.  Denique  simpliciter  intelligit  propheta  romanum  imperium  fuisse  multiplex,  quoniam  divisum  erat  in  multas  provincias,  et  singulis  provinciis  praeerant  qui  rerum  potiebantur  Romae,  et  qui  autoritate  et  gratia  pollebant  prae  aliis:  sortiebantur  proconsules  et  praetores,  sed  valebat  semper  gratia,  ut  satis  notum  est  ex  historiis.  Pergamus:  8.  Intelligebam  (hoc  est,  attentus  eram)  ad  cornua:  et  ecce  cornu  aliud  parvum  exortum  fuit  inter  alia:  et  tria  ex  cornibus  prioribus  ablata  sunt  e  facie  eius:  et  ecce  oculi  quasi  oculi  hominis  in  cornu  illo,  et  os  loquens  grandia.  Pergit  Daniel  in  descriptione  quartae  bestiae:  ac  primo  dicit  se  fuisse  attentum,  ut  etiam  secum  nos  ad  seriam  meditationem  adducat.  Nam  quod  dicitur  de  quarta  bestia,  fuit  imprimis  memorabile,  et  ideo  observatu  dignum.  Haec  igitur  ratio  est  cur  Deus  cor  servi  sui  admiratione  perculerit.  Neque  enim  propheta  studium  suum  applicuit  ad  con-  Calvini  opera.  Vol.  XLI.