5:489  CONSILIUM  PAULI  III.  Nam  respicere  oportet  non  solum  ad  Germaniam,  verum  etiam  ad  Gallias,  Hispanias,  Italiam  et  reliquas  Christianorum  provincias  neque  credendum  est,  quod  si  quid  ob  quietem  Germaniae  novi  in  religione  fiet,  sine  scitu  et  consensione  aliarum  provinciarum,  id  posse  carere  aut  magna  calumnia  et  scandalo  aut  perniciosissimo  exemplo.  Praeterea  si  quid  privatim  in  Germania  constitueretur,  quod  ab  aliis  provinciis  non  probaretur,  esset  magnum  monstrum  in  corpore  Christi,  quae  est  ecclesia,  quod  membra  non  cohaererent,  et  unitas  non  servaretur.  Respiciendum  plane  est,  nec  solum  ad  Gallias,  [fol.  29]  Hispanias,  Italiam,  sed  ad  totum  quoque  orbem.  At  quia  nihil  in  religione  petunt  novari  protestantes,  feed  ea  in  usum  modo  revocari,  quae  tradidit  Christus,  ipsi  commendarunt  apostoli,  observavit  vetus  ac  purior  ecclesia,  corrigi  autem  et  repurgari,  quae  his  ipsis  adversantur,  si  ad  eum,  quem  postulant  modum,  reformentur  ecclesiae,  de  assensu  omnium  ubique  Christianorum  minime  ambigendum  est:  eodem  enim  spiritu  Christi  aguntur,  quicunque  Christi  sunt.  Atque  ut  aliqui  sive  per  errorem,  sive  propter  vim  Antichristi  assentiri  statim  non  queant,  non  est  tamen  Christi  mandato  salutique  ecclesiarum  sic  praeferenda  eorum  vel  ignoratio,  vel  infirmitas,  ut  dum  his  nostros  attemperamus,  utrumque  illorum  negligamus;  in  mediis  rebus  plurimum  semper  est  deferendum  fratrum  imbecillitati,  at  in  iis  quae  certa  ratione  a  Christo  sunt  commendata,  qui  hominum  gratiae  vel  minimum  aliquid  concedendum  putat,  eo  ipso  prodit  se  parum  in  Christi  schola  profecisse.  Pietas  enim  sine  controversia,  sine  exceptione  pro  necessario  habet,  quidquid  Christus  iubet.  Quum  per  hos  viginti  annos  toties  concilium  vel  pollicendo  vel  denunciando  verba  dederit  pontifex  et  Gerrnanis  et  aliis  gentibus,  quis  non  credat  eum,  quoties  de  concilio  loquatur,  fucum  pro  more  facere  ut  effugium  inveniat?  et  omnino  fallitur,  qui  ab  ipso  exspectat  pium  concilium,  quamdiu  in  antiqua  sua  disciplina  perseverat.  Ergo  in  re  desperata,  in  tam  magna  populi  Dei  ludificatione,  quid  aliud  Germanis  superest,  quam  ut  ipsi  tandem  in  Domino  conveniant,  de  restituenda,  quam  prostratam  iacere  vident,  religione  piam  habeant  consultationem  ?  Et  sua  quidem  consulta  reliquis  nationibus  iudicanda  offerant,  ipsi  tamen  interim,  et  quae  certo  praecepta  sunt  ore  Christi  amplectantur,  et  quae  palam  sunt  prohibita,  corrigant,  tollantque  de  medio?  Inde  quid  apud  ullos  homines,  quorum  habenda  sit  ratio,  vel  offendiculi,  vel  calumniae  metuendum  est?  Fuerunt  certe  et  semper  erunt  aliqui  ex  eo  hominum  genere,  quos  regnum  Christi,  simul  ac  erigitur,  ad  insaniam  rabiemque  adigit.  Sed  de  illis  scriptum  est  mittendos  esse,  quia  caeci  sunt  et  duces  caecorum.