25:489  489  COMMENTARIUS  IN  IOSUE  CAP.  IX.  490  convenit:  ut  plenius  apud  Mosen  reperient  lectores.  32.  Scripsit  quoque  in  lapidibus.  Diversa  fuit  lapidum  de  quibus  nunc  agitur  ratio,  in  quibus  voluit  Deus  semper  exstare  legis  suae  monumentum,  ut  tanquam  oppositis  claustris  munita  esset  pura  religio  contra  superstitiones  Aegypti.  Itaque  calce  illiti  erant,  quo  magis  essent  conspicui,  et  distinctior  lectio  scripturae.  Eorum  vero  sententiae  libenter  subscribo,  qui  per  legem  repetitam  intelligunt  exemplar  descriptum:  quod  vulgus  copiam  vel  duplum  nominat.  Quanquam  mihi  credibile  non  est,  totum  volumen  illic  fuisse  exaratum  :  nec  vero  lapides  quamlibet  magni  tam  prolixos  sermones  capere  poterant.  Itaque  legis  nomine  summam  et  sanctiones  notari  existimo:  unde  palam  factum  est,  etiam  exteris  qui  terram  ingrediebantur,  quisnam  Deus  illic  coleretur:  et  sublata  fuit  erroris  excusatio,  dum  lex  non  in  libro  recondita,  sed  omnium  oculis  patefacta  fuit.  Denique  quamvis  muti  essent  sacerdotes,  clare  lapides  ipsi  loquuti  sunt.  33.  Universus  autem.  Tertium  specimen  obedientiae,  quod  omnes  tribus  Israel  locavit  Iosue  in  monte  Garizin  et  in  monte  Ebal,  ut  senis  ordinibus  inter  se  responderent.  Sic  enim  dispositae  erant,  ut  sex  tenerent  montem  Ebal,  totidem  e  regione  starent  in  monte  Garizin.  Levitae  autem  medium  spatium  occupabant  cum  arca  foederis,  ut  Deus  undique  a  suo  populo  circumdaretur.  Dicitur  vero  Iosue  stetisse  ut  benediceret  populo  primum:  nempe  quia  Dei  consilium  fuit,  populum  suaviter  et  amabili  comitate  ad  se  allicere.  Etsi  enim  Moses,  quo  perstringat  populi  contumaciam,  maledictiones  tantum  commemorat:  certum  est  tamen  fuisse  quasi  accidentales:  quia  genuina  haec  fuit  ratio  ut  benedictiones  ad  obsequium  flecterent  parum  alioqui  morigeros.  Verum  ubi  nihil  profuit  tam  humana  invitatio,  additae  sunt  maledictiones  in  novum  subsidium  et  remedium.  Deus  amplam  mercedem  pollicitus  fuerat  servis  suis  qui  legi  obedirent.  Rursum  propositis  maledictionibus  transgressores  terruerat.  Nunc  coguntur  singuli  eius  iudicio  palam  subscribere  dum  ad  singulas  sententias  respondent,  Amen.  Hoc  enim  modo  non  solum  audiunt  se  damnari  ore  Dei,  sed  tanquam  missi  ab  eo  praecones  quae  ipsos  maneat  poena  denunciant.  Similis  promulgatio  facta  erat  in  planitie  Moab  ultra  Iordanem:  sed  nunc  sanctius  adstringuntur,  et  agnoscunt  qua  lege  habitaturi  sint  in  terra  Chanaan.  Accessit  non  leve  pondus,  quod  parvuli  quoque  adhibiti  sunt  testes.