5:488  stare  se  posse  confidat?  Hinc  reputa,  quo  animo  ad  legitimum  consessum  sit  descensurus.  Est  et  rationi  consonum,  quum  res  religionis  pt  fidei  pertineant  ad  omnes  Christianorum  provincias,  ut  omnium  votis  componantur  ex  quorum  consilio  et  autoritate  si  quid  in  religione  erit  mutandum  vel  corrigendum,  id  immutetur  et  corrigatur.  Sane  consonum,  nec  unquam  vel  ab  una  ecclesia  componentur,  siquidem  ex  verbo  Dei  id  fiat,  quin  communibus  omnium  Christianorum  votis  componantur.  Hoc  enim  perpetuis  consentientibusque  votis  ubique  terrarum  suspirant,  ut  Christi  religio,  quae  diu  adeo  misere  collapsa  afflictaque  fuit,  aliquando  excitetur  et  quasi  postliminio  reversa  suaeque  integritati  ac  puritati  restituta  vigeat  ac  floreat.  Verum  si  unus  quilibet  Christianus  simul  ac  Domini  vocem  audierit,  quocunque  vocatur  sequi  debet,  etiam  si  totus  orbis  reclamet  ac  repugnet,  multo  minus  impediri  aut  retardari  debet,  si  sint  qui  se  comites  adiungere  cunctentur.  Quod  si  hoc  privati  cuiusque  [fol.  28]  officium  est,  quid  ecclesiis  est  faciendum  aut  nationibus  quibus  Dominus  veritate  sua  illucet,  ut  se  in  rectam  viam  recipiant?  An  non  protinus,  postposito  omnium  hominum  respectu,  suscipere  debent  quod  mandatur?  Neque  enim  timendum  est  ne  in  eo  rem  ingratam,  taceo  iniuriam,  aliis  ecclesiis  iacturae  sint.  Omnes  enim  id  Christiani,  omnes  ecclesiae  Christi  primum  in  votis  habent,  ut  Christus,  sicut  unus  est  dominus  et  magister,  ita  ubique  cum  summa  reverentia  et  observantia  audiatur.  Sed  nec  spiritus  Christi,  si  invocetur,  deesse  ecclesiis  sustinebit,  quo  docente  non  tantum  intelligant,  quid  recipiendum,  quidve  reiiciendum  sit,  sed  etiam  ad  pacis  unitatisque  studium  dirigantur.  Sic  fiet  ut  agnita  priorum  ecclesiarum  resipiscentia,  posteriores  se  libenter  accommodent.  Et  sicut  1)  ea  quae  restitui  flagitant  protestantes,  sic  clare  in  divinis  literis  tradita,  quae  correcta  volunt  tam  aperte  a  Deo  improbata  et  damnata,  ut  multos  propterea  convenire,  quo  obscura  plenius  illustrentur,  involuta  explicentur,  dubia  confirmentur,  nihil  necesse  sit.  At  ut  commodum  esse  demus  plures  nationes  de  reformatione  communiter  consultare,  an  est  tamen  propterea  uni  aut  alteri  perseverandum  in  manifestis  religionis  vitiis,  adeoque  in  repulsa  regni  Christi,  quia  caeterae  nationes  Antichristi  arte  aut  vi  impeditae,  consilium  hoc  suscipere  in  praesentia  vel  non  volunt  vel  non  possunt?  1)  Quae  hic  sequuntur  minus  sana  nobis  videntur.  Sensus  quidem  satis  perspicuus,  verum  in  phraseos  tenore  elucidando  haeremus,  et  vel  autor  em  ipsum  vel  correctorem  hbri  humani  aliquid  passum  esse  credimus.  Quid  si  pro  :  sicut,  reponeremus:  simul?