39:488  quamvis  toties  illis  promissa  fuisset.  Exhortatio  igitur  haec  continet  promissionem  :  et  interea  propheta  admonet,  quum  Deus  temporalem  poenam  exegerit  de  electo  populo,  vindictam  eius  fore  perpetuam  contra  Babylonios.  Deus  enim  non  modo  temperat  rigorem  suum  erga  fideles,  ubi  ipsos  castigat,  sed  dat  semper  felicem  exitum,  ut  omnes  afflictiones  sint  adiumento  in  salutem,  quemadmodum  Paulus  docet.  Denique  poenae,  quas  Deus  filiis  suis  infligit,  totidem  sunt  medicinae.  Semper  enim  consulit  eorum  saluti,  etiam  ubi  irae  suae  signa  demonstrat.  Sed  alia  est  ratio  impiorum.  Omnes  enim  poenae  perpetuae  sunt,  etiam  quae  videntur  habere  propinquum  finem.  Quare?  tendunt  enim  ad  aeternum  exitium.  Hoc  significat  propheta,  quum  iubet  pios  qui  residui  fuerint,  cito  fugere  ex  Chaldaea,  quemadmodum  vidimus  hesterna  lectione,  quum  dicebat,  Fugite  ab  excandescentia  irae  Dei.  Subest  igitur  tacita  comparatio  inter  poenas,  quae  reprobis  ultimum  interitum  afferunt,  et  temporales,  quas  Deus  filiis  et  electis  suis  infligit.  Iubet  ipsos  recordari  Iehovae  e  longinquo.  Quidam  hoc  ad  tempus  septuaginta  annorum  referunt,  sed  nimis  restricte,  meo  iudicio.  Ego  itaque  non  dubito  quin  propheta  iubeat  ipsos  bene  sperare,  et  respicere  in  Deum,  quamvis  ab  ipso  longe  profligati  fuerint,  ac  si  prorsus  esset  ab  illis  alienatus:  et  ideo  sic  resolvi  potest  haec  oratio,  Quamvis  procul  a  Deo  absitis,  vos  tamen  oportet  eius  esse  memores.  Nam  exsilium  illud,  ut  alibi  dictum  fuit,  species  erat  reiectionis.  Dispulsi  ergo  fuerant  in  longinquas  terras  Israelitae,  ac  si  Deus  nunquam  ipsos  restituere  vellet.  Quum  igitur  tanta  esset  distantia  locorum  inter  Chaldaeam  et  inter  Iudaeam,  quid  aliud  poterat  venire  miseris  exsulibus  in  mentem,  nisi  ita  Deum  ab  illis  esse  remotum,  ut  frustra  ipsum  quaererent  vel  invocarent?  Propheta  huic  diffidentiae  occurrit,  et  ipsorum  fiduciam  erigit  ut  non  desinant  ad  Deum  confugere,  quamvis  tam  longe  profligati  essent  in  longinquas  terras.  Memores  ergo  estote  Iehovae  e  longinquo.  Deinde,  Ierusalem  ascendat  super  cor  vestrum,  hoc  est,  quamvis  tot  obstacula  possint  fidem  vestram  interrumpere,  tamen  adiicite  animos  ad  Ierosolymam.  Conditio  illius  populi  flagitabat,  ut  hoc  modo  animarentur,  quia,  ut  dictum  fuit,  poterant  centies  desperare,  et  ita  obstupescere  in  suis  malis.  Ergo  ut  accessus  illis  ad  Deum  pateat,  testatur  propheta,  quamvis  sit  longe  remotus,  tamen  ipsorum  adhuc  curam  gerere,  et  paratum  esse  ad  opem  ferendam,  ubi  invocatus  fuerit.  Et  eadem  etiam  ratione  iubet  applicare  animos  ad  Ierosolymam,  ut  scilicet  templum  Dei  praeferant  toti  mundo,  et  nusquam  sint  quieti,  donec  ipsos  Deus  restituerit,  et  libertas  data  fuerit  eius  colendi.  Est  autem  hic  locus  dignus  observatu,  quia  eius  utilitas  hodie  ad  nos  pertinet.  Ubi  enim