9:487  487  DE  VERA  PABTICIPATIONE  488  crepet  sonitus,  dum  Christi  verba  ad  suum  delirium  trahere  conatur.  Tantundem  rationibus,  quas  firmissimas  adducere  se  putat,  apud  sanos  proficiet.  Dicit  in  veteri  testamento  omnia  typis  et  figuris  fuisse  adumbrata:  in  novo  autem,  figuris  abolitis,  vel  potius  impletis,  ipsam  rei  veritatem  praestari.  Sit  sane  ita:  sed  an  inde  colliget  aquam  baptismi  vere,  proprie,  realiter  et  substantialiter  esse  Christi  sanguinem?  Longe  rectius  Paulus  (Col.  2,  18):  qui  dum  corpus  hodie  pro  veteribus  figuris  constare  docet,  non  intelligit  signis  compleri  quod  tunc  adumbratum  fuit:  sed  Christum  ipsum  statuit,  in  quo  quaeratur  substantia  et  veritas.  Itaque  paulo  ante,  quum  dixisset  fideles  circumcisos  esse  in  Christo  circumcisione  quae  non  fit  manibus,  mox  adiungit  huius  rei  pignus  et  testimonium  in  baptismo  etiam  accedere,  ut  veteri  sacramento  novum  respondeat.  Suo  more  citat  Heshusius  sententiam  ex  epistola  ad  Hebraeos,  sacrificia  veteris  testamenti  ἀντίτυπα  fuisse  τῶν  ἀληθινῶν:  quando  illic  ἀληθινὰ  vocantur  non  coena  et  baptismus,  [pag.  44]  sed  mors  ipsa  et  resurrectio  Christi.  Confessus  sum  iam  ante  in  coena  et  baptismo  aliter  offerri  Christum  quam  in  figuris  legalibus:  sed  nisi  veritas,  de  qua  illic  disputat  apostolus,  altius  quaeritur  quam  in  sacramentis,  prorsus  evanescet.  Ergo  quum  legalibus  umbris  opponitur  Christi  praesentia,  perperam  id  ad  coenam  restringitur:  quum  de  manifestatione  sermo  sit,  in  qua  consistit  salutis  nostrae  perfectio.  Atque  ut  concedam  Christi  praesentiam  trahi  ad  novi  testamenti  sacramenta,  certe  eadem  erit  baptismi  et  coenae  ratio.  Dum  itaque  sic  ratiocinatur  Heshusius,  Sacramenta  evangelii  Christi  praesentiam  requirunt:  Coena  est  sacramentum  evangelii,  Ergo  requirit  Christi  praesentiam,  ego  vicissim  regero:  Baptismus  est  sacramentum  evangelii,  Ergo  requirit  Christi  praesentiam.  Si  ad  suum  asylum  transsiliat,  in  baptismo  non  esse  dictum:  Hoc  est  corpus  meum,  nihil  hoc  ad  praesentem  causam,  cuius  definitio  fundata  est  tantum  in  veteris  et  novi  testamenti  discrimine.  Desinat  igitur  inepte  garrire:  Si  panis  coenae  rei  absentis  est  symbolum,  esse  igitur  symbolum  veteris  testamenti.  Porro  meminerint  lectores  controversiam  esse,  non  de  absentia  qualibet,  sed  tantum  locali.  Neque  enim  Christo  permittit  Heshusius  nobis  adesse,  nisi  se  pluribus  locis,  ubicunque  celebratur  coena,  praesentem  sistat.  Unde  etiam  apparet  eum  nimis  confuse  balbutire,  dum  praesentiam  fructui  opponit:  quia  utrumque  optime  convenit:  quamvis  loco  distet  a  nobis  Christus,  immensa  tamen  spiritus  sui  virtute  nobis  esse  praesentem,  ut  eius  caro  nobis  sit  vivifica.