55:487  487  1.  Iudas  Iesu  Christi  servus,  frater  autem  Iacobi,  vocatis,  qui  in  Deo  patre  sanctificati  sunt,  et  in  Iesu  Christo  custodit^  2.  misericordia  vobis,  et  pax,  et  dilectio  augeatur.  1.  Iudas  Iesu  Christi,  etc.  Christi  servum  se  vocat,  non  qualiter  promiscue  nomen  hoc  in  omnes  pios  competit,  sed  apostolatus  sui  respectu.  Peculiariter  enim  censentur  Christi  servi,  quibus  publicum  aliquod  munus  iniunxit.  Scimus  autem  quorsum  hoc  titulo  se  ornare  apostoli  soleant.  Ius  ac  potestatem  docendi  temere  sibi  arrogat  quisquis  vocatus  non  est:  ergo  apostolis  testimonium  est  sua  vocatio,  quod  non  privato  se  arbitrio  ingerant.  Quamquam  hoc  solum  per  se  non  sufficeret,  in  officio  esse  constitutos,  nisi  fideliter  in  eo  se  gererent.  Et  certe  utrumque  complectitur  qui  se  Dei  servum  esse  praedicat:  nempe  et  sibi  functionis,  quam  exercet,  autorem  esse  Deum,  et  bona  fide  se  exsequi  quod  mandatum  est.  Quia  vero  hunc  titulum  plerique  mentiuntur,  ac  se  falso  iactant  esse,  a  quo  longissime  absunt,  semper  videndum  an  res  ipsa  professioni  respondeat.  Frater  Iacobi.  Nomen  adscripsit  quod  ecclesiis  magis  celebre  ac  notum  erat.  Etsi  enim  a  nemine  mortalium  pendet  doctrinae  fides  et  autoritas:  magnum  tamen  hoc  fidei  subsidium  est,  quum  nobis  comperta  est  hominis  integritas  qui  doctoris  partes  suscipit.  Adde  quod  Iacobi  autoritas  non  quasi  privati  cuiuspiam  hominis  hic  obtenditur:  sed  quia  apud  omnes  ecclesias  unus  ex  praecipuis  Christi  apostolis  habebatur.  Erat  autem  hic  Alphaei  filius:  quemadmodum  alibi  dixi.  Imo  locus  hic  mihi  suffragatur  contra  Eusebium  et  alios  qui  tradunt  discipulum  nescioquem  Obliam  cognomine,  illum  esse  cuius  meminit  Lucas  Act.  15,  13,  et  21,  18,  qui  prae  apostolis  in  illa  ecclesia  excelluerit.  Atqui  non  dubium  est  quin  Iudas  fratrem  suum  hic  nominet,  quia  inter  apostolos  fama  eminebat.  Ergo  eum  fuisse  probabile  est  cui  praecipuum  honorem  a  reliquis  concessum  narrat  Lucas.  Vocatis  qui  in  Deo.  Fideles  omnes  hoc  nomine  designat,  quia  Dominus  sibi  eos  segregavit:  sed  quia  vocatio  nihil  est  quam  aeternae  electionis  effectus,  interdum  pro  ea  capitur.  In  hoc  loco  parum