37:486  tatem  regni  et  sacerdotii.  Hoc  prius  denunciatum  fuerat  tam  ab  Isaia,  quam  ab  aliis  prophetis:  sed  contemptae  fuerant  omnes  minae.  Nam  vivo  Isaia  rex  Babylonis  ambiverat  amicitiam  regis  Ezechiae:  et  putabant  Iudaei  sibi  opportune  fuisse  oblatum  illud  praesidium  contra  Assyrios.  Sed  non  expendebant  Dei  manu  regi  corda  hominum,  et  flecti  ia  omnes  partes:  neque  etiam  reputabant  se  iam  a  multis  annis  provocasse  Dei  vindictam,  et  illum  sibi  esse  hostem.  Quum  ergo  ita  contemptae  et  quasi  ludibrio  habitae  fuissent  omnes  minae,  nunc  Ieremias  prodit  in  medium,  et  dicit  venturos  esse  septentrionales  populos,  nempe  tam  Assyrios,  quam  Chaldaeos.  Nam  scimus  monarchiam  unam  fuisse  absorptam  ab  altera.  Chaldaei  enim  dominati  sunt  Assyriis,  atque  ita  factum  est,  ut  totum  fere  imperium  orientale,  exceptis  Persis  et  Medis,  ad  ipsos  transierit.  Respectu  autem  Iudaeae  erant  aquilonares.  Ideo  propheta  dicit  se  vidisse  ollam  ferventem.  Multi  per  ollam  intelligunt  regem  babylonium.  Sed  videntur  male  accipere  quod  propheta  dicit:  et  possem  refellere  eorum  interpretationem,  nisi  contentus  essem  simplici  veritate,  quae  deinde  in  progressu  melius  patebit.  Ergo  olla  fervens  est  populus  ipse  iudaicus,  quemadmodum  suo  loco  clarius-videbitur.  Neque  enim  volo  nunc  in  unum  acervum  omnia  colligere.  Sed  dicitur  populus  esse  similis  ollae  ferventi,  quia  Dominus  coxit  ipsos,  donec  redacti  fere  essent  in  nihilum.  Dicitur  autem  pars  ollae  spectare  versus  septentrionem,  quoniam  illinc,  sicuti  continuo  post  exponit  Ieremias,  accensus  erat  ignis.  Et  apte  convenit  similitudo.  Nam  ubi  apponitur  olla  ad  ignem,  fervet  ab  ea  parte,  quae  igni  proxima  est,  et  bullae  omnes  transeunt  in  diversam  partem.  Dicit  ergo  ollam  ebuliisse,  sed  ita,  ut  os  eius  esset  a  parte  septentrionali,  nempe  quoniam  illic  erat  ignis,  et  illic  erant  flabella.  Denique  Deus  prophetae  suo  voluit  ostendere  populum  similem  esse  carni,  quae  coniecta  in  ollam  coquitur,  et  postea  exuritur,  vel  redigitur  longo  tempore  in  nihilum.  Vidit  propheta  os  ollae  ferventis,  vel  faciem,  nempe  a  qua  parte  ebulliebat,  spectare  versus  septentrionem:  ideo  respondet  Deus  interpres  huius  visionis,  quam  obtulerat  servo  suo,  Ab  aquilone  erumpet  malum  super  cunctos  habitatores  terrae  nempe  Iudaeae.  Pronuntiat  his  verbis  Deus  se  iam  accendisse  ignem  apud  Chaldaeos,  et  Assyrios,  quo  populum  suum  instar  carnis  excoquat,  et  tandem  consumat  prorsus,  quemadmodum  fieri  solet  ubi  caro  manet  in  sua  olla,  et  ignis  subinde  accenditur,  et  adsunt  etiam  flabella,  necesse  est  carnem  prorsus  in  nihilum  redigi,  postquam  cocta  est,  vel  elixa.  Sic  etiam  testatur  Deus  iam  ignem  esse  accensum  in  Chaldaea  et  Assyria,  qui  Iudaeos  non  tantum  coquat,  sed  etiam  redigat  in  nihilum.  Caeterum  aliis  verbis  idem  exprimit,  nempe  malum  venturum  esse  a  septentrione  31*