32:486  de  Dieu,  qu'elle  leur  donne  promesse  de  salut,  qu'elle  les  meine  a  Iesus  Christ,  qu'elle  les  incite  a  invoquer  Dieu,  qu'elle  leur  baille  des  ceremonies  pour  estre  confermez  en  cela,  et  puis,  qu'elle  les  conduit,  et  qu'elle  les  tient  en  bride.  Et  de  fait,  il  n'y  a  qu'un  seul  verset  en  ce  Pseaume  yci  (combien  qu'il  y  en  ait  beaucoup)  la  ou  il  n'y  ait  un  de  ces  mots  exprime,  c'est  ascavoir,  ou  de  la  Loy  de  Dieu,  ou  de  ses  Commandemens,  ou  de  ses  Ordonnances,  ou  de  ses  Statuts,  ou  de  ses  ��Tesmoignages,  ou  de  sa  Voix,  ou  de  ses  Iugemens,  ou  de  sa  Iustice.  Ces  mots-la  donc,  sont  yci  tant  souvent  reiterez,  qu'il  n'y  a  pas  un  seul  verset,  ou  il  n'y  en  ait  l'un,  ou  quelque  fois  deux:  comme  nous  le  verrons  en  tout  le  Pseaume.  Or  maintenant  venons  au  propos  qui  est  yci  contenu:  Bien-heureux  sont  ceux  qui  gardent  les  tesmoignages  de  Dieu,  et  qui  le  cerchent  en  tout  leur  coeur.  En  premier  lieu,  David  monstre  (comme  i'ay  desia  declare)  que  nous  aurons  bien  profite  en  la  Loy,  quand  nous  cognoistrons  quelle  affection  Dieu  nous  porte,  et  comme  nous  devons  estre  certifiez  de  sa  volonte,  et  de  son  amour  paternel.  Et  puis  il  adiouste  a  quelle  fin  c'est  que  Dieu  nous  donne  une  telle  certitude:  c'est  afin  (dit-ii)  que  nous  le  cerchions.  Car  ii  est  certain,  que  quand  nous  aurons  cognu  Dieu  tel  qu'il  se  monstre  par  sa  Parole,  qu'il  est  impossible  que  nous  ne  soyons  incitez  et  esmeus  a  nous  addonner  a  luy.  Et  qu'-  ainsi  soit,  voyci  une  bonte  inestimable  qui  nous  est  declaree  en  Dieu.  Qui  sera  l'homme  si  pervers  et  si  destitue  de  sens  et  de  raison,  qui  ne  soit  content  de  se  renger,  ou  il  pense  que  gist  tout  son  bien  et  sa  felicite?  Et  ainsi  donc,  quand  il  ne  nous  chaut  de  cercher  Dieu,  c'est  signe  que  nous  n'avons  rien  cognu  de  ce  qu'il  nous  monstre  de  sa  bonte  et  misericorde,  et  de  toute  ceste  affection  paternelle  dont  nous  avons  tesmoignage  en  la  Loy,  et  en  l'Escriture  sainte.  Or  pource  qu'il  ne  coustera  gueres  a  beaucoup  de  gens,  de  faire  semblant  de  cercher  Dieu,  David  monstre  qu'il  ne  le  faut  point  cercher  des  pieds  et  des  mains,  par  gestes  exterieures  du  corps  tant  seulement,  mais  d'une  vraye  affection  et  pure.  Bien-heureux  sont  ceux  donc,  qui  le  cerchent  de  tout  leur  coeur,  dit-il.  Comme  s'il  disoit,  Non  point  a  la  facon  commune  des  hypocrites,  qui  font  de  grandes  levees  de  bouclier,  il  semblera  que  ce  ne  soit  que  feu  d'eux.  Nenny,  non:  mais  que  l'affection  entiere  et  veritable  y  soit.  Quant  a  ce  qu'il  dit,  De  tout  leur  coeur,  c'est  pour  nous  monstrer,  que  Dieu  ne  veut  point  souffrir  un  tel  partage  comme  les  hommes  le  feront  souvent:  car  ils  seront  bien  contens  de  s'adonner  a  Dieu  en  partie,  et  veulent  avoir  liberte  de  se  tenir  au  monde,  et  de  ne  servir  a  Dieu  que  comme  a  demy.  Or  David  declare,  qu'il  le  faut  servir  de  31*