25:485  485  COMMENTARIUS  IN  IOSUE  CAP.  VIII.  486  sub  umbra  vicinae  urbis  quae  longe  excellebat  conservarentur.  18.  Dixit  autem  Iehova.  Docet  hic  locus,  vel  rara  urbis  munitione,  vel  audacia  civium,  vel  trepidatione  populi  israelitici  redditam  fuisse  difficilem  victoriam:  quia  Deus  hastae  elevatione  se  urbis  fore  expugnatorem  promittit.  Porro  in  re  indubia  supervacuum  fuisset  symbolum.  Sollicitos  ergo  et  perplexos  fuisse  animos  oportet,  quando  Deus  fiduciae  vexillum  manu  Iosue  attollit  ne  fatiscant.  Quanquam  paulo  post  notatur  diversus  finis,  ubi  dicitur,  insidias  hoc  modo  fuisse  excitas,  et  cucurrisse.  Quod  si  illud  surgendi  signum  fuit,  non  conveniet,  in  hasta  ostensam  fuisse  victricem  Dei  potentiam,  quae  dubitationem  omnibus  eximeret.  Verum  quia  non  exprimitur,  militibus  ad  insidias  dispositis  causam  exeundi  fuisse,  quod  hastam  viderint,  fieri  potest,  ut  sponte  progressi  sint,  vel  quia  opportunum  erat  tempus,  vel  quia  clamor  et  strepitus  admonuit  iam  commissum  esse  proelium.  Nec  vero  credibile  est,  longo  spatio  interposito  conspectam  ab  illis  fuisse  hastam:  praesertim  quia  Iosue  in  valle  substiterat.  Ad  haec,  si  dicamus  elevationem  hastae,  quae  alio  spectabat,  illis  quoque  profuisse,  ut  magis  animarentur,  in  eo  nihil  erit  absurdi.  Hoc  quidem  fixum  manere  debet,  solenni  tessera  certiores  de  felici  proelii  eventu  fuisse  redditos:  deinde  non  aliud  fuisse  Iosue  consilium,  quam  suos  ex  Dei  mandato  incitare.  Sequitur  enim  tandem,  Iosue  non  retraxisse  manum  nisi  urbe  capta,  hostibus  ubique  deletis,  belloque  illo  profligato.  Unde  apparet,  in  medio  conflictu  gestasse  quasi  insigne  triumphi,  ne  de  successu  Israelitae  ambigerent.  Quamvis  enim  eos  iuberet  manus  conserere,  et  armis  fortiter  uti,  simul  tamen  clare  denunciabat  eos  iam  vicisse.  Etsi  vero  seriem  rei  gestae  nonnihil  obscurat,  quod  bis  idem  repetitur:  summa  tamen  satis  liquet:  filios  Israel  retrocessisse  metum  fingendo,  nec  ante  initium  pugnandi  esse  factum  quam  cives  Ai  a  reditu  et  urbis  suae  defensione  exclusi  essent:  postquam  vero  confligere  coeperant  duo  exercitus,  alios  surrexisse  ex  insidiis:  tantamque  fuisse  festinationem,  ut  flamma  ex  incendio  erumperet,  quum  terga  verterunt  hostes:  unde  coniicere  licuit,  urbem  ab  Israelitis  teneri  :  sed  praecipuam  stragem  fuisse  editam,  ubi  in  occursum  prodierunt  qui  in  urbe  erant  :  quia  tunc  undique  deprehensi  nihil  amplius  remorae  attulerunt  vel  resistendo,  vel  fugiendo.  Ergo  desperatione  exanimes,  et  simul  in  angustias  redacti  passim  caesi  fuerunt.  Quod  autem  subiicitur  non  ante  editam  fuisse  in  urbe  stragem,  quam  reversi  sunt  qui  fugam  simulaverant,  ita  interpretor,  coniunctis  viribus  irrupisse,  ut  collecta  praeda  occiderent  quicunque  adhuc  erant  residui.  Si  quis  excipiat,  quum  proelium  committeretur,  fuisse  exustam:  respondeo,  ignem  quidem  fuisse