25:484  clementer  populo  suo  indulget,  cui  hostes  tam  facile  vincendos  tradit.  Mirificus  vero  favor  in  eo  praesertim  apparet,  quod  omnes  excaecat,  ne  quidquam  de  insidiis  subolfaciant.  Nec  vero  dubito,  ubi  dicitur  eos  nescivisse,  quin  scriptor  historiae  rarum  et  insolitum  Dei  beneficium  commendet,  quia  triginta  millia  quae  Iosue  comitabantur,  deinde  quinque  alia  quasi  umbra  manus  suae  protexerit,  ut  omnes  hostes  laterent.  Iam  ubi  quinque  millium  fit  mentio,  non  ita  interpretor,  quasi  novas  insidias  submiserit  Iosue,  ac  si  multitudo  iam  nimia  non  sufficeret:  sed  nunc  demum  ostendit  quomodo  triginta  quinque  quae  armaverat  hominum  millia  distribuerit.  Quorsum  enim  tantae  multitudini  tam  exiguum  subsidium?  Iam  idem  locus  designatur  qui  ante,  ubi  subsistere  iussi  sunt;  quod  in  duas  turmas  non  quadraret.  15.  Et  profligati  sunt  Iosue.  Alterum  stratagema,  quod  fugam  simulando  hostes  procul  abstrahunt,  ne  sit  illis  deinde  in  urbem  receptus,  quia  ante  flagravit  incendio,  quam  suspicarentur  quidquam  sibi  mali  a  tergo  metuendum  esse.  Dum  ergo  Israelitas  quasi  victos  persequitur  rex  Ai,  pars  exercitus,  quae  versus  Bethel  latebat,  satis  habuit  temporis  ad  capiendam  urbem,  ut  sero  agnoscerent  cives  prorsus  se  periisse.  Nam  quum  iam  ante  repulsi  passim  trucidarentur,  conspecta  urbis  flamma  desperatione  fracti  sunt,  et  undique  circumventi,  ne  quis  effugeret.  Quod  hic  quaerunt  nonnulli,  dolone  et  per  insidias  liceat  hostes  opprimere,  ex  crassa  imperitia  nascitur.  Certum  enim  est  non  feriendo  solum  geri  bella,  sed  eos  censeri  optimos  duces,  qui  arte  et  consilio  pollent  magis  quam  impetu:  deinde  ut  quisque  longo  usu  factus  est  veterator,  ita  optimum  esse  militem.  Ergo  si  legitimum  sit  bellum,  extra  controversiam  est,  consuetis  vincendi  artibus  patefactam  esse  viam:  modo  ne  vel  pactis  induciis,  vel  alio  modo  fidem  datam  fallamus.  17.  Nec  remansit  quisquam.  Liquebit  ex  contextu,  deprehensos  fuisse  aliquos  in  urbe  et  occisos:  ideoque  tenendum  est,  non  omnes  absque  exceptione  eruptionem  fecisse,  ut  senes  quoque  et  feminae  et  imbellis  turba  se  in  campos  proiecerint:  sed  sensus  est,  nihil  ad  custodiendam  urbem  relictum  fuisse  praesidii.  Idem  et  de  Bethel  pronunciat,  unde  coniicere  promptum  est,  Bethel,  quia  exiguum  erat  oppidulum,  militasse  sub  alieno  ductu.  Hinc  factum  est,  ut  propria  urbe  quam  tueri  non  poterant,  relicta  et  deserta,  omnes  suas  vires  obtulerint  regi  Ai,  cuius  forte  tributarii  erant.  Porro  an  ad  regem  Ai  profecti  sint  ante  adventum  populi  israelitici,  ut  coniunctis  copiis  pugnarent,  incertum  est.  Probabilis  tamen  coniectura  est,  quia  pares  non  erant  ad  resistendum,  ex  compacto  in  urbem  munitam  et  magis  populosam  venisse.  Certe  non  aliter  putarunt  se  fore  salvos,  quam  si