8:483  483  REFUTATIO  ERRORUM  484  mortem  crucis  (Phil.  2,  6).  Nego  aliquid  de  gloria  divinitatis  fuisse  imminutum:  sed  quia  in  carnis  infirmitate  obscura  et  contempta  delituit,  Christus  ipse,  qui  unus  est  homo  et  Deus,  dicitur  exinanitus  fuisse.  Neque  enim  hoc  referri  vel  ad  divinitatem  vel  ad  humanitatem  commode  potest,  sed  utramque  simul  Paulus  complectitur,  quia  non  duplicem  faciunt  Christum,  sed  unum  duntaxat  constituunt.  Qui  mediocriter  versati  sunt  in  scripturis,  agnoscunt  hanc  genuinam  esse  phrasin  spiritus  sancti.  Qui  religiose  cogitant  de  redemptionis  nostrae  arcano,  suavissimam  consolationem  percipiunt  quum  audiunt  Christum  duabus  ita  naturis  constare,  et  quidem  distinctis,  ut  tamen  unus  sit:  atque  eum  qui  filius  est  Mariae,  simul  et  coniunctim  esse  filium  Dei:  et  qui  filius  est  Dei,  filium  esse  eundem  Mariae,  ut  frater  noster  sit,  ac  caro  nostra:  nos  vero  per  [pag.  40]  ipsum  filii  Dei.  Ad  secundam  quaestionem.  Regnum  Dei  incipere  in  hominibus  sentimus  quando  regenerantur.  Tunc  autem  regenerari  dicimus,  quando  illuminantur  in  Christi  fidem,  reformantur  in  obedientiam  Dei  ipsorum  corda,  et  in  summa,  quando  in  ipsis  instauratur  Dei  imago.  Sed  regenerationem  nego  momento  perfici:  satis  est  si  quotidianos  faciat  progressus  usque  ad  mortem:  ut  summa  excellentia  in  hoc  mundo  sit  tamen  cum  profectu  coniuncta.  Hinc  etiam  sequitur,  inchoari  duntaxat  regnum  Dei  in  nobis:  quamdiu  hic  vivimus  novis  quotidie  incrementis  augeri:  perfectionem  autem  eius  hic  non  exstare.  Plena  est  scriptura  testimoniis  ad  hanc  rem  probandam:  a  quibus  supersedeo,  ne  laborando  in  rei  clarae  probatione  sim  ridiculus.  Neque  in  singulis  tantum  hominibus  scriptura  regnum  Dei  promoveri  docet:  sed  aetatibus  etiam  attribuit  augmenta.  Quemadmodum  Paulus,  dum  veterem  populum  nobiscum  comparat,  dicit  nos  adolevisse  in  iustam  aetatem,  pueros  fuisse  qui  sub  lege  vixerunt  (Gal.  4,  1  seqq.).  Utrosque  tamen  filios  esse  testatur  et  haeredes,  et  liberos,  et  spiritu  libertatis  praeditos,  cuius  auspiciis  inchoatur  et  impletur  in  nobis  Dei  regnum.  Deinde  alteram  quoque  exceptionem  adhibemus,  quod  nunc  per  spem  ingressi  in  regnum  Dei,  realem,  quam  vocant,  possessionem  olim  cernemus:  hoc  est,  quod  nunc  spe  obtinemus,  re  ipsa  Christus  fruendum  exhibebit  ultimo  suo  adventu.  Neque  hoc  membrum  dubium  esse  debet  inter  eos  qui  se  aliquid  in  sacris  literis  legisse  profitentur.  Itaque  non  satis  assequor  quorsum  [pag.  41]  tendat  haec  quaestio.  Ad  tertiam.  Non  negamus  quin  baptismus  fidem  requirat:  sed  non  qualis  requiritur  in  coena.  Fides  enim  relationem  semper  ad  Dei  promissionem  habet.  Ideoque