5:483  CONSILIUM  PAULI  III.  ripiunt,  qui  diripientibus  eripiunt,  ut  veros  pastores  praeficiant.  Non  episcopos  eiiciunt,  qui  instituunt  religionem.  Non  profanant  qui  instaurant.  Quod  facere  protestantes  palam  est,  sed  non  impune.  Quid  enim  aliud  sonat,  quid  contendit  tota  eorum  doctrina  quam  Christo  Domino,  quia  via,  veritas  et  vita  est,  fidendum  et  vivendum  esse,  quum  pontificii  fiduciam  salutis  in  divos,  in  ossa  et  simulacra  eorum,  in  caeremonias,  in  opera  hominum  distrahant.  Plerique  nihil  docent  quam  quem  vivunt  epicurismum.  Notior  enim  est  romana  religio  quam  boni  omnes  velint.  Iam  quid  est  diripere  ecclesias,  si  id,  quod  in  solenni  usu  pontificii  habent,  non  est?  Quae  parochia,  quae  abbatia,  quis  episcopatus,  aut  quodnam  opulentius  sacerdotium  idoneis  et  qui  in  suo  ministerio  servos  se  esse  ecclesiae  intelligant  confertur,  et  non  occupatur  ab  iis  qui,  quum  non  alias  artes  didicerint  [fol.  22]  quam  venationes,  lenocinia  et  similes  vel  ineptias  vel  nequitias,  quum  ad  episcopatus  veniunt,  putant  esse  iusta  illarum  praemia.  Itaque  ne  a  professione  sua  desciscant,  nihil  quam  satrapas,  venatores,  lurcones,  ganeones,  scortatores,  milites  etiam  et  gladiatores  praestant.  Id  vero  canones  sacrilegium  esse  definiunt,  et  ecclesiarum  depraedationem.  Quidquid  enim  rerum  ecclesiasticarum,  non  vel  in  usam  sacri  ministerii,  vel  in  pauperes,  vel  publicas  populi  Dei  necessitates  impenditur,  id  per  sacrilegium  ecclesiis  eripi  canones  iudicant.  Ita  quem  quaeso  protestantes  episcopum  potuerunt  eiicere,  quum  pridem  inter  eos,  qui  ecclesias  hoc  nomine  detinent,  rarissimus  sit  qui  haberi  episcopus  possit?  Nec  enim  episcopus  haberi  populo  christiano  potest,  nisi  qui  supremo  in  ecclesia  loco  hac  conditione  sedet,  ut  et  doctrina  et  vitae  sanctimonia  primus  emineat,  ut  summo  studio  in  id  se  impendat,  docendo,  sacra  mysteria  administrando  et  disciplinam  Christi  exercendo,  quo  ecclesia  sibi  credita  quum  accessione  eorum,  qui  a  Christo  abducti  erant,  quotidie  augeatur,  tum  profectu  incrementoque  pietatis,  in  iis  qui  ad  Christum  iam  conversi  sunt,  novos  subinde  progressus  faciat.  Quae  est  vero  denique  illa  religionis  profanatio  quam  protestantibus  isti  impingunt?  Curarunt  protestantes  apud  suos,  ut  populus  pro  impuris  et  irreligiosis  hominibus,  qui  sacrum  ministerium,  et  id  modis  omnibus  depravatum,  pro  quaestu  habebant,  eos  ministros  acciperet,  qui  et  ministerium  Christi  sincerum  praestent,  et  vivant  sine  crimine.  Pro  impiis  et  pestilentibus  commentis,  quibus  et  verus  Dei  cultus  destruebatur  et  tota  pietas  una  cum  salute  hominum  eversa  erat,  sanam  Christi  doctrinam  audiret.  Pro  ea,  quam  depravatissimam  habebat,  et  sacramentorum  et  disciplinae  administratione,  legitimam  et  a  Christo  institutam  amplecteretur.  Atque  istuc  ita  habere  non  dubitant  protestantes  se  coram  concilio  et  quibuslibet  piis  et  religiosis  iudicibus  posse  facile  comprobare,  quod  etiam  facturos