5:482  partim  inscitia,  partim  etiam  malitiosa  perfidia,  Christi  veritas  sepulta  fuit,  vel  potius  e  mundo  exterminata.  Nam  quales  habuit  pontifices  Roma  a  quadringentis  aut  quingentis  circiter  annis,  notius  est  quam  ut  commemorari  necesse  sit.  Qui  vero  sub  illo  dominatu  titulos  personasque  gesserunt  episcoporum  in  orbe  christiano,  quasi  nihil  aliud  haberent  muneris,  quam  ut  praedarentur  expilarentque  ecclesias,  docendi  curam  maxima  ex  parte  a  se  ablegarunt.  Qui  vero  docendi  officium  usurparunt  aut  stultis  et  insulsis  nugis  inebriabant  plebem  aut  impiis  perniciosisque  opinionibus  dementabant.  Interim  exstincta  veritatis  luce  exposita  erant  praedae  et  quaestui  sacra  mysteria,  nec  alium  fructum  habere  putabantur,  quam  ut  populus  ad  ea  obstupesceret.  Sic  enim  de  industria  boni  interpretes  obscurabant,  quo  facilius  deinde  venalia  prostituerent.  Eant  nunc  et  querantur  fidem  refrixisse.  Quod  autem  dicit  nihil  esse  proclivius  quam  abducere  homines  a  continenti  vita  ad  voluptuosam,  a  duriore  ad  molliorem,  ab  obedientia  in  libertatem,  quis  sine  risu  legat?  siquidem  quam  continenter  et  [fol.  21]  austere  vivat  romana  curia  et  omnes  illic  formati,  postremo  quicunque  notam  et  characterem  eius  ubique  gentium  ferunt,  dicere  quid  attinet?  Non  ergo  mirum  si  hic  se  persuasurum  mundo  speraverit,  actum  esse  de  continentia,  sanctitate,  obedientia  et  omni  genere  virtutis,  si  semel  a  romana  disciplina  discessum  fuerit;  verum  ubi  subierit,  hic  eos  loqui  qui  totum  orbem  nequitia  sua  corruperint,  ac  omnibus  flagitiorum  formis  terram  contaminaverint,  quis  non  graviter  indignetur  audere  ita  aliis  exprobrare  mollitiem,  delicias  et  inobedientiam?  scilicet  ignotum  est  romanas  libidines  pudori  ac  pudicitiae  nihil  reliqui  fecisse,  luxum,  intemperiem,  portentosas  delicias  laxatis  fraenis  apud  omnes  romanae  sedis  creaturas  dominari,  obedientiam  omnem  Dei  verbique  ipsius  ita  proiectam,  ut  iam  nec  apud  homines  dissimulent.  Quum  ergo  pudere  ipsos  desierit,  bonis  certe  ex  animo  deplorandum  est,  tam  sceleratos,  probrosos  et  ad  omne  impuritatis  nequitiarumque  genus  proiectos  homines  audere  se  adhuc  ostentare  pro  custodibus  severitatis,  continentiae  et  obedientiae.  Quum  nullum  unquam  in  terra  exstiterit  hominum  genus  magis  ab  omni  moderatione,  disciplina,  obedientia  alienum  et  abhorrens,  nullum  ad  delicias,  importunas  voluptates,  insolentiam,  impuritatem,  legum  omnium  contemptum,  scelerum  omnium  licentiam,  magis  dissolutum  et  prostitutum.  Neque  seducunt  homines  solum  sed  ecclesias  diripiunt,  episcopos  eiiciunt,  religionem  profanant,  atque  id  impune.  Primum  non  seducunt,  qui  homines  ab  inviis  erroribus  ad  Christum  reducunt.  Non  ecclesias  di-  31