37:482  populi  status.  Sic  enim  iam  longo  usu  praevaluerat  impietas,  contumacia  et  obstinata  pravitas,  ut  necesse  esset  initium  facere  a  ruina  et  eradicatione  et  similibus.  Non  potuit  igitur  plantare  Ieremias,  neque  erigere  templum  Dei,  quin  prius  destrueret,  evelleret,  perderet,  exscinderet.  Quare?  Nam  diabolus  illic  erexerat  sibi  palatium.  Quum  enim  religio  fuisset  contempta  a  multis  annis,  tunc  diabolus  quasi  esset  locatus  in  summo  tribunali,  sine  controversia  regnabat  et  Hierosolymae  et  in  tota  Iudaea.  Quomodo  igitur  potuit  illic  erigi  Deo  templum,  in  quo  pure  coleretur,  nisi  ruinae  praecederent?  Ita  diabolus  corruperat  totam  terram.  Scelera  enim  scimus  tunc  passim  grassata  fuisse:  ac  si  terra  plena  esset  spinis  et  sentibus.  Non  potuit  igitur  plantare  Ieremias,  vel  seminare  doctrinam  coelestem,  donec  purgata  esset  terra  tot  vitiis  et  inquinamentis.  Haec  certe  ratio  est,  cur  priore  loco,  de  excidio,  et  ruina,  et  exterminatione,  et  eradicatione  disserat,  postea  subiiciat  plantationem  et  aedificium.  Congeries  etiam  verborum  ostendit  quam  alte  radices  suas  fixisset  impietas,  et  contemptus  Dei.  Poterat  simpliciter  ita  loqui  Deus,  Constitui  te  ut  evellas  et  perdas,  vel  diruas:  poterat  contentus  esse  duobus  verbis  in  duplici  metaphora,  quemadmodum  subiicit  postea  plantationem  et  aedificium.  Sed  quoniam  obstinati  erant  Iudaei  in  sua  malitia,  quoniam  tanta  erat  pervicacia  ipsorum,  ut  non  statim,  neque  primo  die,  nec  levi  opera  possent  corrigi:  ideo  plura  verba  Deus  accumulat,  et  hoc  modo  animat  prophetam  suum,  ut  infatigabili  studio  pergat  in  purgandis  illis  sordibus,  quae  vitiaverant  totam  terram.  Nunc  ergo  tenemus  et  summam  rei,  et  sensum  verborum.  Loquitur  autem  iterum  de  regibus  et  populis:  quia  utcunque  datus  proprie,  ac  dicatus  fuerit  genti  suae  Ieremias,  tamen  per  accidens,  ut  loquuntur,  etiam  profanis  gentibus  datus  fuit  propheta,  ut  postea  videbimus.  Et  videtur  consulto  Deus  hic  posuisse  reges  et  gentes,  ut  deiiceret  supercilium  stulti  illius  populi,  qui  volebat  immunis  esse  ab  omni  obiurgatione.  Dicit  igitur  se  dedisse  autoritatem  servo  suo,  non  modo  in  Iudaea,  sed  etiam  per  totum  orbem  :  quasi  diceret:  Vos  estis  tantum  exigua  portio  hominum,  vultisne  hic  cornua  erigere  contra  servum  meum?  atqui  sine  profectu  hoc  estis  facturi.  Dominabitur  enim  non  tantum  Iudaeae,  sed  etiam  cunctis  gentibus  et  populis,  adque  adeo  regibus  ipsis  :  hoc  est,  doctrina  quam  apud  ipsum  deposui,  tantae  est  potentiae  et  virtutis,  ut  emineat  supra  omnes  mortales,  nedum  supra  unam  gentem.  Interea  videmus,  quamvis  hominum  improbitas  cogat  Deum  severitate  uti,  tamen  nunquam  ipsum  oblivisci  suae  naturae,  quin  clementer  invitet  eos,  qui  non  sunt  prorsus  desperati,  ad  resipiscentiam,  ac  spem  veniae  et  salutis  illis  proponat.  Et  hoc  semper  retinet  31