20:482  aliquando  tuis  literis  amice  admonueris  de  illa  sua  postrema,  tum  de  praedestinatione,  tum  de  libero  arbitrio,  longe  a  priore  diversa  doctrina.  Non  dubito  etiam  quin  ille,  ut  erat  humanus  et  tibi  amicissimus  atque  familiaris,  adde  et  qui  (scio)  te  tuasque  admonitiones,  idque  merito,  magni  faciebat:  non  dubito,  inquam,  quin  ille  vir  Dei  literis  tuis  responderit.  Est  autem  negotium  mihi  cum  hominibus  non  tantum  plus  quam  Lutheranis  in  re  sacramentaria,  sed  (quod  peius  est)  fere  Pelagianis  in  articulo  de  praedestinatione,  libero  arbitrio  et  gratia  Dei.  Quoniam  vero  urgent  postremos  Philippi  locos,  et  autoritas  Philippi,  ut  scis,  magna  est  et  semper  fuit  in  Germania:  idcirco  si  possem  ex  ipsius  literis  demonstrare,  illum  non  ita  impie  de  articulis  sensisse,  quemadmodum  ipsi  adversarii  eius  locos  communes  interpretantur,  foret  bonae  causae  operae  pretium.  Si  quas  igitur  habes  iis  de  rebus  illius  ad  te  literas,  quae  ad  promovendam  bonam  causam  aliquid  valeant,  eas  ad  nos  mittas  per  Christum  servatorem  rogo.  Ego  vero  sancte  promitto,  ubi  illis  usus  fuero,  me  bona  fide  remissurum:  feceris  rem  causae  utilem  et  amicis  gratissimam.  De  rebus  nostris  nihil  adhuc  scribo  quia  nondum  plene  licet.  Hoc  tantum  possum  scribere  et  affirmare,  rem  esse  in  eo  statu  ut  Domini  non  possint  doctrinam  a  me  hic  ut  piam  traditam,  et  a  Marbachio  ut  impiam  improbatam  damnare,  quin  etiam  scientes  et  volentes  tum  doctrinam  (ut  interim  de  aperto  Dei  verbo  et  de  Patribus  nihil  dicam)  a  M.  Bucero  in  hac  schola  et  ecclesia  traditam:  et  praeter  Capitulum  nostrum  duas  etiam  Germaniae  academias,  Marpurgensem  et  Heidelbergensem  damnent.  Quum  enim  viderem,  mihi  ab  illis  hominibus  non  solum  disputationem  sed  etiam  omne  amicum  et  privatum  colloquium  denegari,  interim  tamen  perpetuo  etiam  e  pulpitis  sanam  doctrinam  damnari,  et  me  tanquam  haereticum  apud  Dominos  et  per  totam  urbem  traduci,  addere  etiam  eam,  quam  ipsi  contra  me  docent  doctrinam,  doctrinam  esse  omnium  ecclesiarum  quae  Augustanam  confessionem  amplexae  sunt,  ego  volui  videre  an  ita  se  res  haberet*  Veni  itaque  Heidelbergam  et  Marpurgum:  contuli  cum  illis  theologis.  Utraque  academia  non  solum  doctrinam  nostram  probavit,  sed  etiam  aliis  scripturarum  testimoniis  confirmavit,  et  amplissimum  sanae  doctrinae  testimonium  mihi  dederunt.  Neque  hoc  solum,  sed  etiam  rogarunt  ut,  si  Argentinae  esse  non  possim,  ad  se  veniam  ibique  doceam.  Pistorius  non  solum  iudicio  academiae  Marpurgensis  subscripsit,  sed  scripsit  etiam  graves  literas  de  hac  doctrina  ad  D.  Sturmium,  idque  in  hunc  finem  ut  eas  senatui  ostenderet.  Scribit  enim,  se  vehementer  mirari  quid  hoc  sit  quod  doctrinam  illam  Christi,  quam  antea  hic  docuerat  Bucerus*  quamque  senatus  magno  plausu.  31