47:480  seulement  toutes  choses  ont  este  faites  par  icelle,  mais  qu'il  faut  qu'icelles  soyent  fondees  la  dessus:  et  qu'elle  les  maintiene  en  leur  estre.  Or  il  adiouste  puis  apres,  Que  la  vie  estoit  la  lumiere  des  hommes.  Et  pourquoy  est-ce  qu'il  adiouste  ceci?  C'est  pour  deux  raisons.  La  premiere  est  qu'apres  que  nous  avons  cognu  la  puissance  de  Dieu,  et  la  vertu  de  sa  Parolle,  et  haut  et  bas  partout,  il  nous  faut  venir  a  nous:  car  c'est  bien  raison  que  ce  qui  nous  touche  de  plus  pres,  nous  le  contemplions  avec  une  plus  grande  diligence.  Comme  quoy?  Ie  doy  cognoistre  la  bonte  de  Dieu  en  ce  qu'il  conserve  les  chevaux  et  les  boeufs:  comme  David  nous  en  parle,  disant  que  c'est  luy  qui  donne  la  nourriture  a  toute  beste.  Ie  voy  d'autre  part  la  terre  qui  par  le  commandement  de  Dieu  produit  ses  fruits.  Si  ie  regarde  donc  aux  bestes,  ie  dois  cognoistre  la  bonte  de  Dieu,  laquelle  se  monstre  mesme  envers  les  anes  et  les  chiens,  mais  beaucoup  plus  envers  moy.  Dieu  vient  la  dedans  me  faire  sentir  sa  vertu.  Il  me  donne  le  pain  dont  ie  suis  nourri:  et  ne  faut-il  pas  que  ie  soye  touche  au  vif  pour  tant  de  benefices?  Il  est  certain.  Car  aussi  quand  on  met  en  avant  les  oeuvres  de  Dieu,  il  est  parle  notamment  des  hommes,  d'autant  que  Dieu  declare  sa  vertu  en  nous  plus  grande  et  plus  excellente  qu'es  autres  creatures.  Dieu  donc  veut  bien  estre  magnifie  et  au  ciel,  et  en  la  terre,  et  en  tous  ses  faits  que  nous  voyons:  mais  beaucoup  plus  en  l'homme:  pour  ce  qu'il  a  imprime  son  image  en  nous,  plus  qu'en  tout  le  reste.  Car  il  n'a  point  dit  du  soleil,  des  estoilles,  ne  de  quelque  autre  creature  tant  excellente  qu'elle  soit,  Ie  veux  faire  yci  un  chef  d'oeuvre  qui  soit  a  mon  image  et  semblance.  Ainsi  donc  l'Evangeliste  ayant  parle  de  la  vertu  de  la  Parolle  de  Dieu,  laquelle  s'estend  a  toutes  creatures,  il  vient  aux  hommes.  Et  en  cela  nous  monstre  que  si  les  hommes  contemplent  la  bonte  de  Dieu  par  tout  ou  iis  regardent,  il  faut  bien  qu'ils  la  considerent  la  dedans  en  leurs  personnes.  Et  d'autant  que  Dieu  nous  a  fait  cest  honneur  d'estre  magnifie  en  nous,  tellement  que  les  Payens  mesmes  ont  appele  l'homme  un  petit  monde,  pour  ce  qu'on  voit  en  luy  un  chef  d'oeuvre  qui  surmonte  tous  les  autres:  c'est  bien  raison  que  nous  y  cognoissions  la  vertu  et  la  puissance  de  Dieu.  Il  est  vray  que  nous  pouvons  contempler  Dieu  en  toutes  ses  creatures,  mais  quand  il  se  manifeste  en  l'homme,  alors  nous  le  voyons  comme  par  le  visage:  en  lieu  que  le  considerans  es  autres  creatures,  nous  le  voyons  obscurement  et  comme  par  le  dos.  Ainsi  combien  qu'il  soit  dit  que  Dieu  nous  est  fait  visible  aux  creatures,  si  est-ce  qu'en  icelles  nous  ne  voyons  que  comme  ses  pieds,  ses  mains  et  son  dos:  mais  en  l'homme  nous