40:480  posse  aliter  conservari  quam  si  illis  ignosceret,  nempe  in  tanta  duritie  et  contumacia.  Et  certe  sunt  res  coniunctae  et  fere  inseparabiles,  gloria  Dei  et  salus  ecclesiae.  Quum  de  salute  ecclesiae  loquor,  non  comprehendo  eos  omnes  qui  profitentur  se  esse  eius  membra:  sed  intelligo  duntaxat  electos.  Quoniam  vero  Deus  adoptaverat  gentem  illam,  fieri  non  poterat  quin  reliquias  incolumes  servaret:  alioqui  excidisset  eius  veritas:  et  ita  multo  gravius  profanatum  fuisset  eius  nomen.  Hinc  colligere  promptum  est,  quoties  Deus  nobis  ignoscit,  quanquam  se  ipsum  respiciat,  et  velit  hoc  modo  exserere  suam  clementiam:  tamen  alteram  simul  causam  veniae  esse,  quod  nostri  miseretur.  Sed  quum  hic  dicit  se  retraxisse  a  vindicta  manum  suam,  gloriae  suae  respectu,  hoc  modo  magis  prosternit  superbiam  illius  gentis:  quia  quoties  eorum  misertus  fuerat,  putabant  suae  dignitati  et  suis  meritis  aliquid  esse  concessum.  Propheta  igitur  hic  ostendit  non  alia  ratione  fuisse  ereptos  ab  interitu  quum  adhuc  manebant  in  terra  Aegypti,  nisi  quia  Dominus  nomen  suum  exponere  noluit  gentium  probris.  Dicit  autem  in  oculis  gentium  in  quibus  ipsi  erant  in  medio  ipsarum:  ideo  non  solos  Aegyptios  respexit,  sed  alias  etiam  gentes.  Quaeritur  tamen  quo  sensu  mox  subiiciat  se  illis  fuisse  cognitum.  Neque  enim  adhuc  specimen  suae  virtutis  dederat  in  aliis  gentibus.  Miraculis  duobus  apud  ipsos  testatus  fuerat  Mosen  fore  redemptionis  ministrum:  postea  aggressus  est  Moses  ipsum  Pharaonem:  illic  Deus  exseruit  signa  suae  potentiae,  quae  omnes  Aegyptios  merito  terrerent:  sed  fama  ad  alias  gentes  nondum  pervenerat.  Verum  non  debet  haec  notitia  restringi  ad  praeteritum  tempus  simpliciter:  quod  tantum  significat  Deus  se  iam  coepisse  certis  et  illustribus  documentis  testari  Mosen  fuisse  delectum,  per  cuius  manum  populum  suum  vellet  redimere.  Quoniam  ergo  Deus  iam  in  medium  prodierat  cum  illis  insignibus  notis,  dicit  se  cognitum  fuisse  illis  gentibus^  non  quod  fama  ad  eas  penetrasset,  sed  quia  eo  usque  progressus  erat,  ut  non  posset  res  esse  obscura,  quin  omnes  scirent  fuisse  edita  miracula  per  manum  Mosis,  quibus  satis  patefecerat  se  velle  populum  israeliticum  asserere.  Nunc  ergo  tenemus  quo  sensu  dicat  Ezechiel  Deum  fuisse  cognitum.  Quidam  relativum  hoc  sic  exponunt,  Cognitus  fui  illis,  nempe  Israelitis,  in  oculis  eorum,  nempe  gentium.  Sed  sensus  ille  videtur  mihi  coactus.  Itaque  supervacua  est  vox  una,  meo  iudicio,  in  sermone  prophetae.  Simpliciter  enim  significat  Deum  fuisse  manifestatum  in  omnium  gentium  oculis,  nempe  ad  eos  educendos.  Haec  clausula  ostendit  qualis  fuerit  notitiae  species,  nempe  quia  Deus  virtutem  suam  protulerat  insignibus  miraculis  ad  populum  liberandum.  Sequitur,