35:480  doutans  point  qu'il  nous  sauvera:  voire  quelques  efforts  que  Satan  face  et  machine  contre  nous.  Car  Dieu  est  tout-puissant.  En  cela  voyons  nous  qu'il  nous  faut  conioindre  la  puissance  de  Dieu  avec  sa  bonne  volonte  :  voire  telle  qu'il  nous  la  declare  par  sa  parole.  Quand  nous  aurons  cela,  nous  ne  lascherons  point  la  bride  a  beaucoup  de  speculations  extravagantes:  et  aurons  aussi  de  quoy  repousser  les  mocqueries  de  ceux  qui  se  voudroyent  iouer  de  la  vertu  de  Dieu  comme  d'une  pelotte.  Comme  pour  exemple,  Voila  les  Papistes  qui  veulent  que  le  pain  se  change  au  corps  de  Iesus  Christ,  et  que  ce  qui  estoit  pain  auparavant  devienne  Dieu,  et  pour  prouver  leur  dire  ils  alleguent,  Comment?  Dieu  n'est-il  pas  tout-puissant?  Voire?  mais  est-ce  a  ceste  fin-la?  di  luy  donc  qu'il  face  que  le  soleil  soit  obscur:  qu'il  face  que  la  lune  deviene  eau:  qu'il  face  que  la  terre  soit  au  ciel,  et  le  ciel  en  la  terre.  N'est-ce  point  se  mocquer  de  Dieu  que  cela,  quand  nous  viendrons  ainsi  traitter  de  la  puissance  de  Dieu?  n'est  pas  renverser  tout  ordre,  et  le  pervertir?  et  qu'il  n'y  ait  plus  de  discretion  entre  le  blanc  et  le  noir?  Et  ne  voila  point  descirer  meschamment  la  puissance  de  Dieu,  et  l'exposer  en  opprobre?  Et  d'ou  vient  cela?  C'est  que  les  Papistes  n'ont  pas  encores  apprins  ceste  lecon  qui  nous  est  ici  monstree:  c'est  assavoir  que  Dieu  est  puissant  pour  accomplir  ce  qu'il  a  avise.  Or  ou  est-ce  conseil  de  Dieu  en  cest  endroit?  Il  nous  faut  regarder,  Dieu  le  veut-il?  Quand  donc  nous  avons  la  volonte  de  Dieu,  alors  il  nous  faut  estendre  sa  puissance  pour  accomplir  tout  ce  qu'il  a  ordonne  en  son  conseil.  Mais  ne  pensons-pas  que  nostre  Seigneur  vueille  que  les  hommes  facent  voltiger  sa  puissance  ou  bon  leur  semblera.  Retenons  donc  ceste  instruction  qui  nous  est  ici  donnee:  car  puis  que  Dieu  nous  a  declare  sa  volonte  quant  a  nostre  salut,  qu'il  a  dit  qu'il  nous  maintiendra  iusques  a  la  fin,  qu'il  subviendra  a  toutes  nos  necessitez,  qu'il  nous  relevera  quand  nous  serons  abbatus,  qu'il  nous  fortifiera  en  nos  foiblesses.  Puis  que  nous  avons  la  volonte  de  Dieu  notoire  en  ces  choses,  ne  doutons  point  qu'il  n'ait  sa  main  estendu  pour  faire  ce  qu'il  nous  a  dit.  Voila  donc  comme  la  main  et  la  bouche  de  Dieu  se  doivent  accorder.  La  bouche  va  devant,  c'est  a  dire,  son  conseil:  et  puis  sa  main  execute  tout  ce  qu'il  a  determine.  Or  maintenant  nous  avons  ces  deux  choses:  assavoir  qu'il  nous  faut  assuiettir  pleinement  a  ce  que  Dieu  dispose  en  ce  monde.  Et  pourquoy?  Car  son  conseil  est  bon.  Et  puis  nous  savons  aussi  que  cest  office  luy  appartient  de  gouverner:  et  que  c'est  bien  raison  que  toutes  creatures  se  laissent  conduire  par  luy:  et  qu'elles  ne  prenent  point  ceste  liberte  de  se  conduire  d'elles-mesmes  :  mais  qu'elles  s'assu-