25:480  Verum  pueros  ob  crimen  patris  lapidari  et  comburi,  immitis  fuit  vindicta.  Atque  hic  poenam  de  sceleribus  parentum  palam  filiis  Deus  infligit,  contra  quam  per  Ezechielem  pronunciet.  Verum  quomodo  neminem  perdat  insontem,  et  reiiciat  tamen  scelera  patrum  in  filios  breviter  explicui,  ubi  narratum  fuit  de  communi  urbis  excidio  et  promiscua  aetatum  strage.  Qui  tunc  gladio  consumpti  sunt  infantes  et  parvuli,  ideo  tanquam  indigne  occisos  deflemus,  quia  nulla  eorum  culpa  apparet.  Verum  si  reputamus  quanto  altius  penetret  Dei  cognitio  quam  mentis  nostrae  intelligentia,  potius  acquiescimus  eius  decreto,  quam  nostra  temeritate  vesanaque  superbia  nos  efferendo,  in  praecipitium  ruamus.  Certe  inconsiderato  odio  correptus  non  fuit  ut  inhumaniter  filios  Achan  occideret.  Nam  quum  essent  figmentum  et  opus  manuum  eius,  simul  insculpta  in  eorum  carne  erat  circumcisio,  minime  fallax  adoptionis  symbolum,  eos  tamen  morti  addicit.  Quid  nobis  hic  reliquum  nisi  ut  infirmitatis  nostrae  conscii,  incomprehensibili  eius  consilio  cedamus.  Fieri  potest,  ut  mors  illis  ad  medicinam  profuerit.  Quod  si  reprobi  erant,  non  potuit  immatura  esse  eorum  damnatio.  Adde  quod  vitam  quam  dedit,  potest  Deus  quoties  visum  est,  non  magis  morbo  quam  alio  quolibet  modo  auferre.  Discerpet  fera  bestia  infantem  ac  laniabit.  Alterum  virulento  morsu  serpens  exstinguet.  Cadet  unus  in  aquam,  alter  in  ignem,  alium  nutrix  suffocabit,  alium  conteret  lapis.  Imo  nonnullis  antequam  lucem  aspiciant  uterus  est  sepulcrum.  Nullas  ex  tot  mortibus  nisi  Dei  arbitrio  accidere  certum  est.  Quis  tamen  propterea  audebit  litem  contra  eum  movere?  Quod  si  quis  eo  usque  insaniat,  quid  proficiet?  Tenendum  quidem  est,  nullos  eius  mandato  perire,  nisi  quos  morti  destinaverat.  Caeterum  ex  quo  recensentur  eius  boves,  asini,  et  oves,  colligimus  fuisse  satis  locupletem:  ut  penuria  eum  ad  scelus  non  impulerit.  In  quo  se  prodidit  inexplebilis  eius  cupiditas,  quod  res  furtivas  non  ad  usum  sed  ad  luxuriam  appetiverit.  25.  Dixit  Iosue.  Videtur  nimis  dura  esse  insultatio:  ac  si  propositum  esset  miserum  hominem,  quem  ad  patientiam  hortari  debuerat,  prope  ad  furorem  adigere.  Verum  mihi  dubium  non  est  quin  populi  causa  ita  loquutus  sit,  ut  omnibus  utile  esset  exemplum.  Ita  statuo,  noluisse  Achan  desperatione  obruere:  sed  in  eius  persona  ostendere,  quam*  grave  sit  crimen,  ecclesiam  Dei  turbare.  Quanquam  fieri  potest,  ut  homo  superbus  conquestus  fuerit  non  acceptam  esse  suam  satisfactionem,  qua  se  probe  defunctum  putabat,  ideoque  Iosue  corrigendae  vel  frangendae  eius  contumaciae  causa  asperius  invectus  sit.  Nam  et  interrogatio  subindicat  illum  expostulasse:  et  ubi  Deum  iudicem  appellat,  videtur  compescere  hominem  praefractum.