58:48  leur  fantasie  et  a  leur  poste?  Il  est  certain  qu'une  telle  presomption  ne  demeurera  iamais  impunie:  et  on  le  voit  aussi.  Car  pourquoy  est-ce  que  tant  de  canailles  desgorgent  auiourd'hui  leurs  blasphemes  contre  ceste  doctrine  de  la  predestination?  C'est  pource  qu'ils  ne  daignent  point  s'enquerir  de  la  bouche  de  Dieu,  mais  veulent  faire  leur  arrest  selon  que  leur  cerveau  le  porte.  Ouy,  comme  si  nous  estions  idoines  et  suffisans.  Ainsi  donc,  suivons  l'exemple  de  Rebecca:  c'est  a  dire,  quand  toutes  ces  questions  nous  viendront  devant  les  yeux,  et  que  nous  serons  tourmentez  de  coste  et  d'autre,  en  pensant,  Et  comment  est-il  possible  que  la  pluspart  du  monde  perisse,  et  que  le  reste  soit  sauve?  Comment  cela  se  fait  -  il,  que  l'un  soit  esleu,  et  l'autre  reprouve?  Comment  est-ce  que  la  plus  grande  multitude  s'en  va  en  perdition,  et  qu'il  n'y  ait  qu'une  petite  poignee  de  gens,  que  Dieu  reserve  a  soy?  Quand  donc  nous  serons  tormentez  de  cela,  que  nous  venions  a  Dieu  :  c'est  a  dire,  que  nous  escoutions  ce  qui  nous  est  monstre  en  l'escriture  saincte,  prions  Dieu  qu'il  nous  ouvre  les  yeux  et  les  aureilles,  afin  que  nous  apprenions  quelle  est  sa  volonte.  Et  puis,  avons-nous  cela?  Il  nous  y  faut  arrester  du  tout  et  estre  paisibles.  Car  il  n'est  point  question  de  disputer  plus  outre,  quand  Dieu  nous  prononce  son  arrest.  Bref,  iournellement  ceci  est  pour  nous  monstrer  que  iamais  nous  ne  pourrons  estre  disposez,  pour  recevoir  instruction  de  l'escriture  saincte,  et  de  cercher  la  toute  nostre  sagesse,  sinon  que  nous  aions  ceste  modestie  la,  et  ceste  humilite  en  nous  de  n'appeter  point  de  rien  cognoistre  ne  savoir,  sinon  ce  qui  est  la  contenu.  Auiourd'hui  nous  n'avons  pas  besoin  d'avoir  quelque  revelation  du  ciel,  comme  Rebecca  l'a  eue.  Il  est  vray  qu'aucuns  ont  devine  qu'elle  est  allee  a  quelque  Prophete  :  mais  ils  estoient  alors  bien  clairs  semez  au  monde.  Car  on  peut  aisement  recueillir  que  Melchizedec  estoit  trespasse:  et  il  n'y  avoit  plus  qu'Abraham  et  Isaac.  C'est  donc  une  resverie  de  penser  qu'il  y  ait  eu  des  escoles  de  Prophetes:  mais  elle  a  eu  revelation,  comme  le  texte  le  monstre.  Et  auiourd'hui  nostre  condition  n'est  pas  du  tout  pareille,  et  nous  n'en  avons  point  besoin  aussi.  Car  alors  il  n'y  avoit  ne  Loy  ni  Evangile.  Auiourd'hui  nous  avons  toute  perfection  de  doctrine:  car  Dieu  anciennement  a  parle  a  noz  Peres,  et  non  pas  en  cachette,  comme  dit  Isaie,  ni  en  obscurite.  Ce  n'a  pas  este  en  vain  qu'il  a  dit  qu'on  le  cerchast  :  comme  Moise  proteste,  Voici  la  voie,  cheminez  en  icelle.  Ie  vous  ay  propose  auiourd'hui  la  voie  de  salut:  et  le  ciel  et  Ia  terre  me  sont  tesmoins,  que  ie  vous  ay  declare  ce  qu'il  vous  faut  faire  pour  parvenir  a  la  vie  eternelle  Et  puis  combien  que  Dieu  ait  ses  secrets  (dit-il  en  l'autre  passage)  toutesfois  ceci,  c'est  a  dire  la  somme  de  la  Loy,  est  pour  vous  et  pour  voz  enfans  :