48:48  sic  iam  olim  fuisse  a  Deo  constitutum,  ut  Christus  in  summum  honoris  gradum  extolleretur.  Tantundem  enim  valet  ista  loquutio,  sedere  ad  dextram  Dei,  ac  summum  imperium  obtinere:  quemadmodum  postea  fusius  dicetur.  Priusquam  tamen  vaticinium  recitet,  praefatur,  non  competere  nisi  in  Christum.  Ideo  ut  sensus  sit  clarior,  sic  texenda  est  oratio.  Pronuntiat  David  decretum  esse  a  Deo,  ut  rex  ad  dextram  eius  sedeat.  Atqui,  hoc  ad  Davidem  non  pertinet,  qui  in  tantam  altitudinem  nunquam  evectus  fuit.  Ergo  hoc  de  Christo  praedicat.  Porro,  quod  spiritus  sancti  oraculo  praedictum  fuerat,  Iudaeis  non  debebat  novum  videri.  Hinc  liquet  quo  sensu  neget  Petrus,  Davidem  in  coelum  adscendisse.  Non  agitur  hic  de  anima  Davidis,  an  recepta  in  beatam  quietem  ac  coeleste  domicilium  fuerit  :  sed  adscensus  in  coelum  sub  se  comprehendit  quae  Paulus  docet  4.  ad  Ephesios  capite  (v.  9):  ubi  Christum  supra  omnes  coelos  collocat,  ut  impleat  omnia.  Quare,  penitus  supervacua  hoc  loco  est  de  statu  mortuorum  disputatio.  Non  enim  aliud  contendit  Petrus  quam  vaticinium  de  sessione  ad  Dei  dexteram  non  fuisse  in  Davide  completum  :  ideoque  alibi  quaerendam  esse  eius  veritatem.  Quum  autem  inveniri  nisi  in  Christo  nequeat:  superest  ut  Iudaei  prophetia  admoniti  agnoscant  sibi  in  Christo  monstrari,  quod  tanto  ante  praedictum  fuerat.  Verum  quidem  est,  Davidem  autore  Deo  regnasse  et  aliquatenus  fuisse  eius  vicarium:  non  tamen  ut  superior  e$set  omnibus  creaturis.  Quare  sessio  haec  nemini  convenit,  nisi  supra  totum  mundum  emineat.  Dixit  dominus  domino  meo.  Quoniam  haec  legitima  est  imperandi  ratio,  ubi  rex  (aut  quocunque  alio  vocetur  nomine  qui  praeest)  divinitus  se  ordinatum  esse  novit:  ideo  David  nominatim  Christo  datum  esse  regnandi  mandatum  pronuntiat.  Ac  si  diceret,  non  sibi  temere  sumpsisse  honorem,  sed  tantum  paruisse  Deo  iubenti.  Nunc  videndum  est,  an  satis  firma  sit  Petri  ratio.  Colligit  sermonem  haberi  de  Christo,  quia  Davidi  sessio  ad  Dei  dexteram  non  conveniat.  Videtur  hoc  refelli  posse:  quoniam  peculiari  Dei  iussu,  nomine,  et  auspiciis  regnavit  David:  quod  est,  ad  dexteram  Dei  sedere.  Atqui,  Petrus  pro  confesso  sumit  quod  verum  est,  ac  iam  breviter  attigi,  amplius  hic  et  magis  augustum  imperium  notari  quam  quo  potitus  est  David.  Utcunque  enim  vices  Dei  obierit,  et  quasi  eius  personam  sustinuerit  regnando,  haec  tamen  longe  inferior  est  potestas  quam  ut  ad  dextrum  usque  Dei  latus  emineat.  Hoc  enim  Christo  tribuitur,  quia  constitutus  est  supra  omnem  principatum,  et  omne  nomen  quod  nominatur,  non  tantum  in  hoc  saeculo,  sed  etiam  in  futuro.  Quum  longe  infra  angelos  subsidat  David,  non  adeo  celsam  sedem  occupat,  ut  secundus  a  Deo  censeatur.  Omnes  enim  coelos  transscendere  oportet,  ut  veniatur  ad  Dei  dexteram.