47:48  Erigam  illud.  Hic  sibi  Christus  resurrectionis  suae  gloriam  vindicat,  quum  tamen  Scriptura  passim  testetur  opus  esse  Dei  patris.  Sed  haec  duo  probe  inter  se  conveniunt.  Scriptura  enim  ut  Dei  potentiam  nobis  commendet,  patri  hoc  diserte  adscribit,  quod  excitaverit  filium  a  morte:  hic  vero  Christus  peculiariter  divinitatem  suam  praedicat.  Ac  Paulus  utrumque  conciliat  (ad  Rom.  8,  ll),  nam  spiritum,  quem  facit  resurrectionis  autorem,  promiscue  nunc  Christi,  nunc  patris  spiritum  nominat.  20.  Quadraginta  sex  annis.  Consentit  cum  hoc  loco  Danielis  supputatio  (Dan.  9,  25).  Septem  enim  hebdomadas  numerat,  quae  annos  quadraginta  novem  efficiunt:  sed  antequam  ad  finem  ultimae  ventum  esset,  absolutum  templum  fuit.  Quod  in  historia  Esdrae  longe  brevius  temporis  spatium  notatur,  tametsi  aliquam  habet  repugnantiae  speciem,  minime  tamen  cum  prophetae  verbis  pugnat.  Erecto  enim  sanctuario,  antequam  templi  aedificium  perfectum  foret,  sacrificia  offerre  coeperunt:  postea  diu  intermissum  fuit  opus,  populi  ignavia,  quemadmodum  ex  querimoniis  Haggaei  clare  patet  (1,  4).  Severe  enim  Iudaeos  accusat,  quod  nimis  sedulo  intenti  ad  exstruendas  privatas  aedes,  Dei  templum  mutilum  relinquerent.  Sed  quorsum  eius  templi  mentionem  faciunt,  quod  ab  Herode  quadraginta  ante  annis  vel  circiter  excisum  fuerat?  Nam  quod  tunc  habebant  templum,  tametsi  magnificentissime  et  immani  sumptu  erat  exstructum,  intra  octo  tamen  annos  Herodes  praeter  hominum  opinionem  absolverat,  ut  refert  Iosephus  libr.  Antiqq.  15.  cap.  ultimo.  Mihi  probabile  videtur,  perinde  habitam  fuisse  novam  templi  structuram,  ac  si  vetus  illud  semper  in  statu  suo  durasset,  quo  plus  venerationis  inesset:  atque  ita  ex  vulgari  et  usitato  more  fuisse  loquutos,  quod  templum  a  patribus  summa  difficultate  vix  per  annos  quadraginta  sex  conditum  fuerat.  Porro  haec  responsio  satis  ostendit,  quo  animo  signum  petierint.  Nam  si  parati  fuissent  prophetae  divinitus  misso  reverenter  obseqni,  non  ita  superbe  repudiassent  quod  de  officii  sui  approbatione  dixerat.  Testimonium  aliquod  divinae  virtutis  habere  volunt,  interea  nihil  admittunt  quod  non  hominum  modulo  respondeat.  Sic  hodie  papistae  miracula  flagitant,  non  quod  locum  daturi  sint  Dei  potentiae  (nam  illis  fixum  est,  homines  praeferre  Deo,  nec  unguem  unum  ab  eo  deflectere  quod  usu  et  consuetudine  receptum  habent),  sed  ne  absque  ratione  videantur  Deo  esse  rebelles,  colorem  hunc  praetexunt  suae  pervicaciae.  Ita  caeco  impetu  infidelium  animi  secum  tumultuantur,  ut  Dei  manum  sibi  ostendi  cupiant,  nec  tamen  divinam  ease  velint.  22.  Quum  ergo  surrexisset  a  mortuis.  Recordatio  haec  superiori  fuit  similis,  cuius  nuper  meminit  evangelista.  Loquentem  Christum  non  intelli-