40:48  Continuat  eandem  sententiam,  rotas  scilicet  fuisse  quasi  defixas,  non  quod  iacerent,  sed  quia  stabant  absque  ullo  motu.  Hoc  autem  scimus  non  esse  naturale.  Nam  rota  non  potest  stare  super  aliquam  partem  sui  canthi,  sed  cadet  vel  ad  dextram  vel  ad  sinistram,  aut  volvetur.  Dicit  autem  propheta  rotas  fuisse  quasi  immobiles.  Unde  sequitur  agitationem  illarum  fuisse  extrinsecam,  ut  loquuntur.  Postea  pluribus  verbis  idem  confirmat,  quod  scilicet  steterint  rotae  cum  animalibus,  sicuti  ambulabant,  deinde  elevatae  fuerint.  Idem  ergo  propheta  recitat  quod  ante  breviter  attigit.  Sed  quamvis  res  ipsa  sit  obscura,  tamen  hac  copia  verborum  excitat  attentionem,  vel  sciamus  non  frustra  transferri  agitationem  rotarum  ad  animalia,  et  causam  illic  residere:  quia  si  hoc  breviter  fuisset  dictum,  poterat  etiam  neglectim  transmitti:  sed  ubi  toties  dicit  propheta  motas  fuisse  rotas  prout  tractae  sunt  ab  animalibus,  hinc  sequitur  aliunde  pendere,  quemadmodum  dixi,  omnes  rerum  conversiones,  quae  cernuntur  in  mundo.  Ratio  autem  repetitur,  quod  spiritus  animalis  in  rotis  erat,  hoc  est  animalium.  Est  enim  hic  enallage  numeri,  sicuti  prius.  Intelligit  autem  propheta  spiritum  animalium  fuisse  in  rotis,  non  quod  rotae  quidquam  intellexerint,  sed  quod  acceperint  vigorem,  sicuti  luna  mutuatur  fulgorem  suum  a  sole.  Ita  sciamus  rotas  fuisse  impulsas,  non  quod  intelligentia  animalium  transfusa  fuerit  in  rotas.  Deus  enim  non  dat  hyemi  vel  aestati,  non  dat  paci  vel  bellis,  serenitati  vel  tempestatibus,  non  dat  pesti  et  aliis  rebus  mentem  et  consilium:  Quid  igitur?  Nempe  neque  aer,  neque  mare,  neque  terra  per  se  quidquam  habent  vigoris,  nisi  quatenus  Deus  per  angelos  suos  terram  in  hunc  usum  dirigit,  vel  dum  applicat  consilia  hominum  huc  atque  illuc,  vel  ad  bella  vel  ad  pacem.  Nunc  ergo  videmus  simpliciter  quid  sit  spiritum  animalium  esse  in  rotis,  nempe  quod  Deus  transfundat  virtutem  suam  per  angelos,  ut  ne  passer  quidem  cadat  in  terram  sine  eius  providentia,  quemadmodum  dicit  Christus.  Ideo  quoties  nos  sollicitant  res  confusae  ad  desperationem,  veniat  nobis  in  memoriam  haec  sententia  nempe  spiritum  animalium  esse  in  rotis.  Et  certe  quando  subinde  trepidamus  in  rebus  dubiis:  quid  fieret  nisi  acquiescamus  in  hac  doctrina?  nempe  talem  fore  rerum  omnium  exitum,  qualem  Deus  decrevit,  quia  nihil  agitur  nisi  eius  arbitrio:  et  nullus  est  motus,  nulla  agitatio  sub  coelis,  nisi  quam  ipse  inspirat  per  angelos  suos.  Nunc  sequitur,  22.  Et  similitudo  super  capita  animalis  (hoc  est  animalium)  firmamenti  (expansionis,  jppi  est  nomen  illud  quo  utitur  Moses  in  historia  creationis),  tanquam  adspectus  chrystalli  (alii  vertunt  glaciei)  terribilis,  expansi  (firmamenti,  vel  expansionis  extensae