31:48  ne  perfecte  floreat  regnum  Christi,  non  tamen  huius  prophetiae  effectum  abolet:  dum  Christus  dispersas  reliquias  undique  colligit,  et  in  misera  vastitate  suos  retinet  sacro  fidei  vinculo  coniunctos:  ut  non  unus  duntaxat  angulus,  sed  totus  orbis  eius  imperio  subiaceat.  Adde  etiam  quod  utcunque  ferociant  impii,  eiusque  dominationem  repudient:  non  tamen  sua  contumacia  ius  et  potestatem  ipsius  redigunt  in  nihilum:  quo  etiam  pertinet  quod  proxime  sequitur.  9.  Conteres  eos  virga  ferrea,  quasi  vas  figuli  confringes  eos.  Hoc  diserte  expressum  est,  ut  sciremus  potentia  instructum  esse  Christum,  qua  invitis  quoque  et  reluctantibus  imperet.  Subindicat  enim  David  non  omnes  sponte  iugum  subituros,  sed  multos  fore  praefractos  ac  rebelles,  quos  tamen  violenter  domitos  in  ordinem  coget.  Regni  quidem,  de  quo  loquitur,  species  et  decor  in  eo  magis  refulget,  quod  voluntarius  populus  ad  diem  occurrit  ut  se  morigerum  praebeat:  sed  quia  maior  pars  indocili  ferocia  sese  contra  attollit,  necesse  fuit  hoc  quoque  adiungi,  talibus  obstaculis  superiorem  fore  hunc  regem.  Atque  huius  quidem  bellicae  virtutis  speciem  exhibere  coepit  Deus  in  persona  Davidis,  a  quo  scimus  hostes  quamplurimos  armis  fuisse  victos  ac  prostratos:  sed  in  Christo  plenior  constat  veritas,  qui  non  gladio  vel  hasta,  sed  spiritu  oris  sui  impios  ad  interitum  usque  percutit.  Mirum  tamen  videri  posset,  quum  prophetae  alibi  Christi  mansuetudinem,  clementiam  et  facilitatem  celebrent,  hic  rigidum  et  austerum,  plenumque  terroris  describi.  Sed  quia  severa  haec  ac  formidabilis  dominatio  nonnisi  ad  incutiendum  hostibus  metum  posita  est,  humanitati,  quia  suos  Christus  blande  et  suayiter  fovet,  minime  contraria  est.  Nam  ut  se  placidis  ovibus  amabilem  pastorem  exhibet,  ita  feras  bestias  necesse  est  ac  eo  durius  tractari,  ut  earum  truculentiam  vel  corrigat,  vel  compescat.  Itaque  Psalmo  110,  5.  postquam  laudata  est  piorum  obedientia,  simul  potentia  armatur  Christus,  qua  reges  et  exercitus  sibi  adversos  in  die  irae  suae  perdat.  Et  certe  utrumque  illi  apte  tribuitur:  quia  a  patre  missus  est  ut  pauperes  ac  miseros  salutis  nuntio  exhilaret,  captivos  solvat,  aegrotos  sanet,  tristes  et  afflictos  ex  mortis  tenebris  educat  in  lucem  vitae,  Ies.  61,  1.  Rursum  quia  multi  sua  ingratitudine  eius  in  se  vindictam  provocant,  ad  subigendam  eorum  duritiam  quodammodo  novam  personam  induit.  Sed  quaeritur  quodnam  sit  ferreum  istud  sceptrum  quod  Christo  in  manum  dedit  pater  ad  frangendos  hostes.  Respondeo  pro  armis  omnibus  spiritum  oris  sui  ei  sufficere,  sicuti  nuper  ex  Iesaia  citavi.  Ergo  ut  digitum  non  moveat  Christus,  lo-