29:48  de  l'offenser,  mais  que  nous  persistions  de  mal  en  pis:  que  nous  serons  tout  esbahis  qu'il  trouvera  quelque  vengeance  nouvelle,  a  laquelle  iamais  nous  n'avions  pense.  Que  donc  cela  ne  nous  trompe  point,  comme  si  nous  pouvions  mesurer  selon  nostre  sens  et  les  vengeances  de  Dieu,  et  tout  ce  qui  appartient  a  son  iugement:  mais  plustost  sachons  que  ce  sont  des  thresors  cachez,  et  toutes  fois  et  quantes  que  nous  penserons  a  nos  fautes,  que  nous  disions  avec  David,  Seigneur,  qui  est-ce  qui  cognoistra  ses  pechez?  Il  est  vray  que  David  n'estoit  pas  un  hypocrite  pour  se  cacher,  ou  pour  cercher  des  vaines  couvertures  et  frivoles,  pour  desguiser  ses  pechez;  mais  apres  s'estre  bien  examine,  il  voit  que  Dieu  est  un  autre  Iuge  que  luy,  et  (comme  dit  sainct  Iehan)  qu'il  est  plus  grand  que  ne  sont  pas  nos  consciences.  Si  nos  consciences  nous  redarguent:  au  lieu  d'une  faute  que  nous  sentirons,  Dieu  en  cognoistra  cent.  Ainsi  donc  il  ne  reste  sinon  de  s'escrier  avec  David:  Qui  est-ce  qui  cognoistra  ses  fautes!  Seigneur,  purge-moy  de  tant  d'iniquitez  qui  me  sont  cachees.  Voila  comme  il  nous  en  faut  faire,  c'est  qu'en  premier  lieu  nous  mettions  peine  de  bien  sonder  tout  le  mal  qui  est  en  nous:  et  quand  nous  aurons  tout  fait,  que  nostre  conclusion  finale  soit,  que  nous  n'en  concevons  pas  la  centiesme  partie,  et  qu'il  faut  bien  que  Dieu  nous  purge  de  nos  pechez,  voire  combien  que  nous  ne  les  appercevions  pas.  Voila  pour  un  item.  Au  reste,  quant  aux  punitions,  si  Dieu  nous  tient  a  repos  et  a  nostre  aise,  mesmes  qu'il  nous  face  prosperer,  que  cela  ne  soit  point  cause  de  nous  faire  endormir.  Et  pourquoy?  Il  a  cependant  ses  thresors  qui  sont  cachez:  craignons,  encores  que  les  signes  de  son  ire  ne  se  monstrent  pas,  qu'il  semble  qu'il  nous  rie,  si  quelcun  se  sent  coulpable,  qu'il  recoure  a  luy,  et  qu'on  le  prie  qu'il  ne  vueille  point  desployer  les  thresors  de  sa  vengeance:  mais  plustost  qu'il  nous  nettoye  de  toutes  nos  fautes,  et  que  nous  en  soyons  tellement  purs,  que  nous  puissions  venir  devant  sa  face  sans  macule,  estans  irreprehensibles,  non  pas  a  cause  de  nostre  perfection,  mais  d'autant  qu'il  nous  aura  pardonne  nos  offenses,  qu'il  les  aura  ensevelies  pour  ne  les  point  appeller  a  conte.  Voila  donc  comme  nous  avons  a  prattiquer  ce  passage.  Ainsi  en  somme  notons  bien  qu'il  nous  faut  esveiller  pour  cheminer  comme  en  la  presence  de  Dieu.  Puis  qu'ainsi  est  que  rien  ne  luy  eschappe,  qu'il  ne  met  rien  en  oubli,  sinon  quand  il  luy  plaist  user  de  misericorde  envers  nous:  et  comme  il  a  marque  nos  offenses,  qu'aussi  il  a  de  quoy  pour  se  venger,  et  pourra  desployer  des  chastimens  tels,  que  ce  sera  une  chose  horrible  et  espouvantable:  n'attendons  pas  qu'il  execute  une  telle  sentence  sur  nous  :  mais  (comme  i'ay  desia  monstre)  que  nous  le  prions  plustost  de  nous  nettoyer  de  toutes  nos  fautes,  et