5:479  CONSILIUM  PAULI  HI.  morbis  tempestiva  remedia  adhibeantur.  Aliquot  iam  saeculis  pii  bonique  omnes  concilium  ecclesiasticum  flagitant,  quo  corrigantur  nonnulla  vitia  quibus  laborare  ac  premi  christianum  populum  iam  diu  plus  satis  notum  est.  Quae  quum  pridem  intolerabilia  esse  coeperint,  diuturnitate  ipsa  magis  ac  magis  invalescunt.  Postquam  autem  Germaniam  Dominus  puriore  evangelii  sui  praedicatione  dignatus  est,  partim  quia  melius  iam  et  clarius  animadvertebatur  morbi  gravitas,  partim  quia  novum  periculum  imminebat  ab  eorum  improbitate,  qui  lucem  veritatis  exstinguere  nefario  furore  moliebantur,  in  omnibus  imperii  comitiis  decretum  est  non  aliam  esse  viam  succurrendi  collapsis  ecclesiis  et  scandalis  iam  obortis  occurrendi,  nisi  ut  quamprimum  cogeretur  concilium,  quod  si  obtineri  universale  non  posset,  saltem  nationale,  ut  vocant,  a  natione  germanica  haberetur.  Quum  autem  pontificii,  ut  nullam  nequitiae  suae  correctionem  ferre  queunt,  ac  ne  illam  quidem  foeditatis  suae  lernam,  qua  nihil  unquam  in  ecclesia  turpius  exstitit,  attrectari  sustinent,  non  modo  generale,  sed  nationale  quoque  concilium  averterent  mille  machinis,  interim  tamen  Germanos  aliasque  gentes  concilium  subinde  pollicendo  ludificarentur,  visum  tandem  est  imperii  ordinibus  ut,  si  pontifex  concilium  non  convocaret  intra  certum  tempus,  ipsi  conventu  inter  se  habito  suis  ecclesiis  consulerent.  Haec  ista  est  horrenda  a  sede  romana  defectio,  de  qua  hic  nepos  quiritatur.  At  nihil  pensi  habent  sancti  isti  ordinis  ecclesiastici  vindices,  et  canonibus  et  legibus  sancitum  esse,  ut  in  singulis  provinciis  quotannis,  et  in  qualibet  natione,  quoties  aliquid  inciderit  corrigendum,  habenda  esse  concilia.  Quod  si  grassari  malum  latius  coeperit,  generale  concilium  omnino  esse  convocandum.  Hisce  sanctionibus  et  romanus  pontifex  obstrictus  esset,  et  secundum  eas  ecclesiam  regeret,  si  verus  pontifex  esse  vellet.  Nunc  quum  eas  pedibus  conculcet,  quid  ipso  facias?  Adde  quod  oecumenica  olim  concilia  per  Caesares  indicebantur.  Indictioni  et  episcopi  alii  omnes  et  ipse  romanus  libenter  parebat.  Hodie,  si  istis  credimus,  ne  nationale  quidem  indicere  illis  licebit.  Fateor  equidem,  quum  veri  episcopi  Romae  sederent,  quoniam  sedes  illa  [fol.  18]  prima  semper  est  habita,  sine  ipsorum  conscientia,  non  fuisse  celebratum  maius  aliquod  concilium.  Id  eo  postea  detorserunt  romanae  tyrannidis  satellites  et  hodie  detorquent,  quasi  nullum  omnino  ecclesiasticum  conventum,  nisi  idolo  illo  ratum  habente,  nutuque  suo  comprobante,  habere  liceat.  Interim  quum  illis  sit  propositum  omnia  libidinose  pervertere,  susque  deque  habitis  legibus  omnibus  et  canonibus,  contempta  omni  censura,  abiecta  omnis  honestatis  cura,  excusso  prorsus  pudore,  nullo  nec  Dei  nec  hominum  metu,  insanam  dominationem  exercere,  qui  unquam  adduci  poterit,  ut  in  christianum  et  liberum  concilium  descendat,