25:479  479  COMMENTARIUS  IN  IOSUE  CAP.  VII.  480  Quanquam  multorum  hypocrisin  qui  suis  ambagibus  claram  lucem  obnubilant,  damnabit  tam  aperta  responsio.  Emphatica  enim  loquutio  est,  hoc  et  illud  feci:  quae  significat  distincte  et  ordine  singulas  rei  gestae  partes  fuisse  expositas.  Nec  vero  tantum  facinus  agnoscit,  sed  omissa  defensione  ac  omni  praetextu  reiecto,  se  ipsum  in  qualitate  quoque  ipsa  condemnat.  Peccavi,  inquit,  quod  non  diceret  nisi  sacrilegii  conscius:  unde  apparet  errorem  vel  incogitantiam  non  obtendere.  22.  Misit  itaque  Iosue.  Quanquam  novum  non  est,  currendo  et  properando  nuncios  suum  obsequium  probare:  festinatio  tamen  cuius  nunc  fit  mentio,  ostendit  trepide  omnes  fuisse  intentos,  ut  quam  citissime  piaculum  e  medio  tollerent.  Ergo  quia  eos  angebat  ac  cruciabat  severa  illa  denunciatio:  Non  ero  vobiscum  donec  purgati  sitis  ab  anathemate:  ideo  non  tantum  ad  exsequenda  Iosue  mandata,  sed  multo  magis  ad  Deum  placandum  celeriter  currunt.  Porro  ex  rebus  furto  l)  ablatis  :  ubi  ante  oculos  productae  sunt,  satis  superque  patefacta  fuit  ignominiae  et  cladis  acceptae  causa.  Dictum  fuerat,  ideo  terga  vertisse  hostibus,  quia  anathemate  polluti  destituerentur  solito  Dei  auxilio  :  nunc  ex  conspectu  rei  furtivae  colligere  promptum  est,  Deum  merito  illis  fuisse  infestum.  Inde  etiam  admoniti  fuerunt  quanti  faceret  Deus  sibi  totius  terrae  Chanaan  primitias  illibatas  offerri,  ne  sua  liberalitas  unquam  ex  ipsorum  memoria  intercideret.  Simul  didicerunt,  quum  in  occultissimos  quosque  recessus  penetret  Dei  cognitio,  frustra  ad  eludendum  eius  iudicium  integumenta  captari.  24.  Tollens  itaque  Iosue.  Duas  ob  causas  extra  castra  educitur:  ne  labem  ac  pollutionem  ex  caede  contrahant  (sicuti  Deus  semper  in  legitimis  quoque  poenis  manere  voluit  aliquod  humanitatis  vestigium)  deinde  ne  quod  inquinamentum  in  populo  resideat.  Primo  igitur  extra  castra  poenam  sontibus  infligere  solenne  fuit,  quo  magis  a  fundendo  sanguine  abhorrerent.  Sed  nunc  membrum  putridum  a  corpore  resectum  fuit,  et  castra  sordibus  expiata.  Ac  exemplum  memorabile  fuisse  agnoscimus,  quod  nomen  loco  impositum  fuit.  Si  quem  conturbat  vel  offendit  poenae  atrocitas:  semper  eo  redire  convenit,  quamvis  a  Dei  iudiciis  ratio  nostra  dissideat,  piae  tamen  modestiae  et  sobrietatis  fraeno  cohibendam  esse  audaciam  ne  improbemus  quidquid  nobis  non  placet.  Durum  quidem,  immane  et  barbarum  videtur,  teneros  pueros  qui  extra  culpam  erant,  ad  crudele  supplicium  rapi,  ut  lapidentur  et  exurantur.  Quod  in  bruta  animalia  eodem  modo  saevitum  est,  non  ita  mirum:  quia  ut  creata  sunt  hominum  causa,  merito  suos  dominos  sequuntur.  Ergo  quidquid  possedit  Achan  una  cum  ipso  periit  tanquam  accessio.  1)  Princeps  male:  forte.