9:478  et  tamen  imperiose  portentum  quod  sibi  imaginatus  est  non  minus  quam  importune  urget,  corpus  Christi  ore  corporaliter  comedi.  Sunt  enim  haec  ipsissima  eius  verba.  Et  rursum:  Asserimus  non  tantum  fide  fieri  nos  participes  corporis  Christi,  sed  etiam  ore  essentialiter,  seu  corporaliter,  nos  Christum  intra  nos  sumere:  atque  ita  nos  Pauli  et  evangelistarum  verbis  fidem  habere  tebtamur.  Econtra  reiicimus  [pag.  29]  omnium  sententiam  qui  praesentiam  Christi  in  coena  negant.  En  tandem  de  quo  genere  praesentiae  nobiscum  rixetur.  Nempe  quod  sibi  ipse  et  similes  phrenetici  somniant.  Pauli  vero  nomen  et  evangelistarum  tam  crassis  deliriis  obtendere,  cuius  impudentiae  est?  Quomodo  illis  testibus  probabit  ore,  et  corporaliter,  et  intra  nos  sumi  Christi  corpus?  Alibi  confessus  est  nec  dentibus  atteri,  nec  attingi  palato.  Cur  tactum  palati  vel  gutturis  reformidat,  quando  asserere  audet  visceribus  ingurgitari?  Quid  enim  sibi  vult  istud:  Intra  nos?  Quo  recipitur  Christi  corpus,  ubi  per  os  transiit?  Nam  ab  ore,  nisi  fallor,  corporalis  transitus  est  ad  viscera  vel  intestina.  Si  dicat,  calumniose  verbis  asperioribus  sibi  invidiam  fieri,  scire  velim  quid  differant  haec  duo:  Quod  ore  sumptum  est,  corporaliter  intro  recipi,  et:  Transire  ad  viscera  vel  intestina.  Hoc  posthac  teneant  lectores,  probeque  meminerint,  quoties  criminabitur  Heshusius  me  negare  Christi  in  coena  praesentiam,  non  aliud  reprehendere,  nisi  quod  mihi  absurdum  videtur  Christum  ore  deglutiri,  ut  corporaliter  in  ventriculum  descendat.  Et  tamen  queritur  me  ambiguis  vocibus  ludere.  Quasi  vero  non  mea  perspicuitate  in  rabiem  agatur  cum  suis  sodalibus.  Cuius  enim  me  ambiguitatis  convincet?  Fatetur  me  asserere  verum  et  substantialem  esum  carnis  Christi,  et  sanguinis  potum  :  sed  si  quis  mentem  meam  perspiciat,  me  loqui  de  perceptione  meriti,  fructus,  efficaciae,  virtutis  et  potentiae  e  coelo  defluentis.  Hic  vero  non  in  speculo,  sed  coram  perspicitur  maligna  eius  insulsitas,  dum  virtutem  et  potentiam  cum  merito  et  fructu  commiscet.  Quis  enim  ita  loqui  consuevit,  meritum  e  coelo  defluere?  Quod  si  [pag.  30]  ingenuitatis  gutta  in  eo  esset,  ex  ore  meo  vel  scriptis  ita  retulisset:  Ut  substantialis  nobis  Bit  communicatio  cum  carne  Christi,  non  opus  esset  ut  locum  mutet:  quoniam  arcana  spiritus  virtute  vitam  suam  in  nos  e  coelis  diffundit:  nec  obstare  locorum  distantiam  quominus  habitet  in  nobis  Christus,  et  nos  simus  unum  cum  ipso:  quoniam  efficacia  spiritus  cunctis  naturalibus  obstaculis  sit  superior.  Nam  et  paulo  post  videbimus  quam  turpiter  secum  pugnet,  dum  verba  mea  recitat:  Beneficia  Christi  ad  nos  non  pertinere,  donec  ipse  noster  factus  sit.  Eat  nunc,  et  voce  Meriti  claritatem  eius  quam  doceo  communicationis  obscuret.  Excipit:  Si  in  coelo  est  corpus  Christi,  non  esse  igitur  in  coena,