55:478  tis  locis,  tum  ex  epistola  ad  Galatas  colligere  licet,  nebulones  qui  passim  oberrabant  ad  turbandas  ecclesias,  ut  fidem  Paulo  detraherent,  hoc  praetextu  abusos  esse,  quod  illi  minus  bene  cum  reliquis  apostolis  conveniret.  Ergo  probabile  est,  factam  a  Petro  mentionem  Pauli  esse,  ad  testandum  utriusque  consensum:  nam  eiusmodi  calumniae  ansam  praecidere  plusquam  necesse  fuit.  Et  tamen  dum  omnia  propius  expendo,  mihi  fit  verisimilius  hanc  epistolam  ex  Petri  sensu  ab  alio  compositam,  quam  ab  eo  scriptam  esse.  Nunquam  enim  sic  loquutus  fuisset  Petrus:  sed  mihi  sufficit  testem  habere  tum  doctrinae  ipsius,  tum  voluntatis,  qui  nihil  proferat  dissentaneum  ab  iis  quae  dicturus  erat  ipse.  16.  In  quibus  sunt  quaedam.  Hoc  relativum  e  p  i  s  t  o  l  i  s  non  convenit:  est  enim  neutrum  apud  Graecos.  Sensus  est,  In  his  rebus  quarum  meminit  obscuritatem  interdum  subesse,  ex  qua  occasionem  indocti  arripiant  in  suum  exitium  errandi.  Quibus  verbis  monemur,  sobrie  in  his  rebus  tam  altis  et  obscuris  philosophandum  esse:  deinde  adversus  hoc  genus  scandali  erigimur,  ne  stultae  vel  absurdae  quorundam  speculationes  nos  perturbent,  quibus  implicant  ac  contorquent  simplicem  doctrinam  quae  aedificationi  servire  debuerat.  Notemus  autem  non  arceri  nos  a  lectione  epistolarum  Pauli,  quod  nonnulla  contineant  ardua  et  intellectu  difficilia:  sed  potius  nobis  commendari,  modo  sedatam  mentem  ac  docilem  afferamus.  Leves  enim  ac  volaticos  homines  damnat  Petrus,  qui  praepostere  in  exitium  suum  detorquent  quae  sunt  omnibus  utilia.  Imo  hoc  generaliter  in  tota  scriptura  fieri  dicit:  neque  tamen  inde  colligit,  abstinendum  ab  ea  esse,  sed  tantum  corrigenda  esse  vitia  docet  quae  profectum  impediunt:  neque  id  modo,  sed  etiam  letale  nobis  reddunt  quod  Deus  in  salutem  nostram  destinavit.  Quaeritur  tamen  unde  ista  obscuritas:  nam  scriptura  instar  lampadis  nobis  refulget,  certoque  gressus  nostros  dirigit.  Respondeo,  nihil  esse  mirum  si  regni  Christi  mysteriis  obscuritatem  Petrus  attribuat:  praesertim  si  reputemus  quantum  sint  a  sensu  carnis  abscondita:  modum  tamen  docendi  quem  tenet  Deus,  sic  temperatum  esse,  ut  conspicuam  illic  lucem  habeant  quicunque  spiritum  sanctum  viae  ducem  sequi  non  recusant.  Multi  interea  caeci  sunt  qui  impingunt  in  ipso  meridie.  Alii  superbi  qui  per  devia  vagantes,  et  quamlibet  ardua  transvolantes,  se  praecipitant.  17.  Vos  igitur  dilecti.  Postquam  fidelibus  ostendit  pericula  a  quibus  cavendum  erat,  nunc  concludit,  ut  moniti  sapiant.  Sed  vigilantia  opus  esse  docet,  ne  opprimantur.  Et  certe  hostis  nostri  vafrities,  tot  ac  tam  multiplices  insidiae  quibus  nos  adoritur,  impiorum  hominum  captiones  nullum  securitati  locum  relinquunt:  ergo  agendae  sunt  excubiae,  ne  ad  nos  circumveniendos  praevaleant