5:478  castissimis,  significatione  augustissimis  ;  caetera  omnia  liberam  habeant  observationem:  fide  enim  iustus  vivit,  non  caeremoniis.  Quare  quae  fides  ipsa  non  requirit  necessario,  a  nulla  ecclesia  praetextu  communionis  necessario  sunt  exigenda.  Nihil  itaque  a  protestantibus  exsistit,  cur  difficile,  nedum  impossibile  sit  solidam  et  piam  ecclesiarum  concordiam  restituere.  Quod  si  etiam  generale  concilium  [fol.  16]  has  mutationes  non  approbaret,  imo  contrarium  statueret,  quae  spes  esset  reducendae  amplius  Germaniae,  in  suis  opinionibus  iampridem  confirmatae?  Quale  concilii  portentum,  Deus  bone,  hic  nobis  fingit,  in  quo  non  modo  non  approbaretur  quod  Christi  ore  sancitum  est,  sed  contrariis  legibus  palam  abrogaretur.  Hinc  collige  quid  bonae  spei  nobis  faciat  romana  sedes,  etiam  si  concilium  cogeretur.  Cur  igitur  ab  eius  decreti  exspectatione  pendeamus,  quod,  si  factum  esset,  repudiare  oporteret?  Praeterea  periculum  est,  ne  protestantes  multa  de  sua  opinione  concedant,  imo  id  unum  a  catholicis  obtineant,  ut  una  omnes  a  sede  apostolica  deficiant,  quum  id  solum  maxime  cupiant  et  in  votis  habeant.  A  curia  vel  sede  etiam  romana,  si  ita  placet,  non  tamen  apostolica.  Neque  enim  aliud  in  votis  habent  catholici  protestantes  -quam  ut  deiecto  satanae  solio  vera  Christi  sedes  illic  erigatur,  in  qua  apostoli  non  antichristi  sedeant.  Sed  hoc  unum  est,  quod  istos  sollicitos  habet,  ne  quam  scelerate  occuparunt  .et  immaniter  exercent  tyrannidem,  spiritu  oris  sui  Christus  conficiat  et  illustratione  adventus  sui  aboleat.  Siquidem  non  se  ministerium  habere  putant,  sed  effraenem  dominationem,  qua  totum  orbem  servum  sibi  et  quidem  miserrima  servitute  teneant,  utcunque  se  servos  servorum  non  sine  manifesto  ludibrio  nuncupent.  Quare,  ut  initio  dictum,  hoc  omnium  quae  pontificii  contra  protestantes  habent  caput  est,  quod  dum  regnare  volunt  in  ecclesia  et  rerum  potiri,  Christo  locum  non  relinquunt.  Quod  si  evenerit,  ut  est  valde  timendum,  tunc  non  esset  in  potestate  maiestatum  suarum  providere,  quemadmodum  accidit  de  concilia  indicendo  in  diaeta  ratisponensi,  de  qua  re  status  imperii  sine  autoritate  sacrae  caesareae  maiestatis  constitutionem  fecerunt,  sicuti  dicta  maiestas  alias  sanctissimo  domino  nostro  significavit.  Quare,  ut  alia  omittamus,  [fol.  17]  ex  his  paucis  potest  caesarea  et  regia  maiestas  cognoscere  quid  sperandum  sit  ex  amicis  huiusmodi  tractatibus  et  colloquiis  cum  eis  habendis.  Hic  vide  pastoralem  Romanensium  curam  et  quam  sedulo  advigilent,  quo  gravissimis  ecclesiae