37:478  fiet  ut  nemo  stulte  se  ingerat,  et  sibi  arroget  plus  quam  oportet.  Caeterum  ubi  Deus  nos  vocat,  etiam  si  omnia  nos  deficiant,  tamen  obsequendum  est.  Et  colligitur  haec  doctrina  ex  Dei  verbis,  ubi  dicit,  Ne  dicas,  puer  sum,  hoc  est,  etiam  si  sentias  te  facultate  destitui,  sis  tibi  conscius  propriae  infirmitatis,  tamen  ibis,  hoc  est,  necesse  est  te  ire  quocunque  te  misero.  Exigit  enim  Deus  simpliciter  sibi  hunc  honorem  deferri,  ut  homines,  etiam  si  facultas  agendi  non  suppetat,  obtemperent  tamen  eius  mandatis.  Postea  sequitur  8.  Ne  timeas  a  facie  ipsorum,  quia  tecum  ego  (id  est,  ego  sum  tecum)  ad  eripiendum  te,  dicit  Iehovah.  Possumus  ex  hoc  versu  colligere  Ieremiam,  quum  videret  se  vocari  ad  graves  et  duros  conflictus,  fuisse  turbatum,  quia  non  erat  tantum  in  ipso  roboris,  ut  constanter  atque  intrepide  lacesseret  tot  hostes,  et  tam  violentos.  Videbat  enim  sibi  negotium  fore  cum  populo  degenere.  Nam  omnes  fere  desciverant  a  lege  Dei:  et  quum  excusso  iugo  iam  a  multis  annis  ita  proterve  exsultassent,  difficile  erat  ipsos  revocare  ad  obsequium  et  moderationem.  Apparet  igitur  prophetam  hac  difficultate  fuisse  cohibitum  ne  auderet  suscipere  propheticum  munus.  Certum  enim  est,  Deum  adhibuisse  opportunum  remedium  eius  timori.  Quid  autem  dicit?  Ne  timeas  a  facie  ipsorum.  Ergo  quum  dicebat  Ieremias  se  esse  puerum,  respiciebat,  quemadmodum  iam  attigi,  ad  illam  difficultatem,  quod  scilicet  vix  posset  subire  tam  aspera  certamina,  quae  instabant,  cum  populo  illo  rebelli  et  iam  obdurato  in  sua  malitia.  Videmus  ergo  ut  oblique  detrectaverit  onus  sibi  impositum,  quia  non  audebat  palam,  et  ingenue,  et  apertis  verbis  fateri  quod  res  erat.  Sed  Deus  qui  penetrat  in  corda  hominum,  et  cognoscit  omnes  sensus  occultos,  medetur  eius  timiditati,  quum  dicit,  Ne  timeas  a  facie  ipsorum.  Caeterum  ostendit  hic  locus  tunc  ita  invaluisse  corruptelas  in  electo  populo,  ut  nemo  ex  servis  Dei  posset  tranquille  exsequi  munus  suum.  Si  negotium  esset  prophetis  et  doctoribus  cum  aliquo  populo  docili,  non  esset  praeliandum:  sed  ubi  nullus  est  Dei  timor,  nec  reverentia,  imo  ubi  feruntur  homines  post  suarum  cupiditatum  impetus,  nemo  pius  doctor  officium  suum  potest  exercere,  quin  armatus  sit  ad  praelium.  Hoc  igitur  significat  Deus,  quum  prophetam  suum  iubet  esse  bono  animo,  quia  videbat  totidem  fore  illi  hostes,  quotquot  profitebantur  se  esse  filios  Abrahae.  Et  notanda  est  ratio  fiduciae  et  securitatis  quae  additur,  Quoniam  ego,  inquit,  sum  tecum,  ut  te  eripiam.  His  enim  verbis  admonet  Deus  satis  fore  praesidii  in  sua  manu  et  virtute,  ne  propheta  furorem  gentis  suae  metuat.  Erat