20:477  477  SUPPLEMENTUM.  478  4202.  SPINA  CALVINO.  Qua  de  causa  professionem  publicam  evangelii  huc  usque  non  fecerit  declarat,  iam  vero  ad  faciendam  propensum  se  esse  affirmat,  modo  Calvinus  ipsi  accuratius  viam  ostendat  (Ex  autographo  Cod.  Genev.  110,  fol.  27.)  A  Monsieur  Monsieur  Maistre  Charles  despeville.  A  Villefranche.  Io.  Acanthius  clarissimo  viro  Carolo  Passelio  S.  Paulo  serius  tibi  respondeo,  nam  sero  etiam  literas  tuas  accepi.  Quum  enim  gravissime  ex  morbo  capitis  laborarem,  qui  me  octo  iam  menses  et  amplius  tenuit,  non  sunt  mihi  prius  redditae  quam  dolor  coepisset  mitescere  et  illas  legere  utcunque  potuissem.  Pro  quibus  tibi  immensas  et  immortales  gratias  habeo.  Quum  enim  patrem  antea  egeris  docendo  et  erudiendo,  nunc  item  egisti  me  paterne  castigando,  nec  est  quod  horteris  ut  flagella  tua  mitissima  placato  feram.  Sunt  enim  illa  meliora  et  mihi  sane  multo  dulciora  aliorum  osculis.  Et  ut  vere  dicam,  ego  tibi  vitam  et  si  quid  esset  mihi  adhuc  carius  debere  fateor,  qui  sine  ullo  meo  merito  tam  studiosus  sis  salutis  et  officii  mei.  Obsecro  te  tamen  ne  tarditatem  meam  astutiae  aut  malitioso  et  occulto  alicui  consilio  tribuas  :  hoc  enim  tibi  coram  Deo  vere  et  ex  animo  dicam,  me  idcirco  tantopere  distulisse,  partim  ne  praesentia  mea  sanctissimos  illos  coetus  dissiparem,  partim  vero  quod  nondum  certus  essem  an  ecclesiam  pontificiorum  omnino  desererem,  et  novos  coetus  instituere  liceret.  Hoc  enim  in  Iuda  olim  factum  non  fuisse  '  video,  licet  in  templo  cultus  Dei  multis  modis  admodum  contaminatus  esset.  Praeterea  scriptis  Martini,  Philippi  et  Buceri,  cuius  ego  iudicium  et  eruditionem  semper,  ut  pii  omnes,  plurimi  feci,  deterrebar  ut  id  facerem.  Adde  quod  in  commentariis  tuis  nusquam  legi,  quod  meminerim,  ecclesiam  apud  illos  nullam  esse.  Semper  fui  in  ea  sententia  ut  palam  et  fortiter  omnia  improbarentur  quae  contra  verbum  Dei  in  eam  stulta  hominum  religione  aut  alio  consilio  introducta  essent:  sed  ita  tamen  ut  quae  in  illa  adhuc  superessent  ex  institutione  Christi  retineantur.  Nunc  autem  quum  videam  piis  hac  moderatione  non  satisfieri,  et  ecclesiam  cuius  ego  iudicium,  ut  debeo,  magnopere  revereor,  me  perpetuo  accusantem:  quum  denique  postremis  tuis  literis  me  tam  serio  adiuraveris,  et  coram  Deo  nisi  paream  appellaveris,  statui  omnem  semel  moram  et  cunctationem  abrumpere,  et  ea  in  posterum  conari