40:476  Id  quoque  per  similitudinem  dictum  est.  Sed  paulo  post  levare  manum  aliter  non  potest  accipi,  quam  pro  iurare  catachresticws,  ut  dixi:  sed  tamen  ut  nulla  sit  absurditas.  Levavi  ergo  manum  ad  semen  domus  Iacob,  dicendo,  Ego  Iehovah  Deus  vester.  Videmus  ergo  Deum  levasse  manum,  ut  sanciret  apud  populum  foedus  quod  pepigerat.  Nam  ubi  pronuntiat  se  esse  ipsorum  Deum  adstringit  eos  sibi,  et  vendicat  sibi  in  populum  peculiarem:  ita  pactum  suum  confirmat.  Sed  extulerat  simul  manum  vel  brachium  tot  miraculis,  quae  edidit  in  liberando  populo.  Dicit,  die  illa  extuli  manum  meam  ipsis,  vel  erga  ipsos,  ut  educerem.  Iterum  levare  manum  refertur  ad  ipsam  Dei  potentiam,  quod  scilicet  extento  brachio  ipsos  eduxerit  ab  illa  misera  servitute.  Quum  ergo  ita  manum  extulit,  sibi  eos  acquisivit,  ut  non  amplius  essent  liberi,  sed  essent  quasi  eius  peculium.  Postea  adiungit  alia  beneficia,  quod  non  tantum  ipsos  eripuerit  e  tyrannide  Pharaonis,  sed  adduxerit  in  terram  fluentem  lacte  et  melle,  quam  prospexerat  ipsis.  Videmus  ut  breviter  amplificet  Deus  illud  insigne  beneficium,  quo  populum  suum  dignatus  fuerat.  Neque  enim  tantum  fuit  eius  redemptor,  sed  prospexit  illi  ubi  habitaret,  non  tantum  commode,  sed  ubi  afflueret  omnis  copia.  Nam  loquutio  haec  passim  trita  est  apud  Mosen.  In  illo  igitur  eodem  die  quo  eduxi  eos  ex  Aegypto,  simul  adduxi  in  terram  quae  est  desiderium  prae  cunctis  terris,  hoc  est,  quae  desiderabilis  est,  et  excellit  omnibus  delitiis  supra  omnes  terras.  Verum  quidem  est,  alias  regiones  fuisse  non  minus  foecundas:  sed  Deus  ubi  ita  extollit  terram  Chanaan  considerat  eam  vestitam  et  ornatam  suis  dotibus.  Atqui  nulla  erat  sub  coelo  regio,  quae  posset  conferri  terrae  Chanaan  una  in  re,  quod  scilicet  Deus  eam  sibi  elegerat  quasi  domicilium  terrestre.  Quum  ergo  terra  Chanaan  excelluerit  supra  omnes  alias,  hoc  respectu,  merito  vocatur  desiderium  omnium  terrarum,  vel  desiderabilis  prae  terris  omnibus.  Nunc  sequitur  alterum  membrum,  quod  scilicet  Deus  instituerit  Iudaeos  ad  pietatem,  et  retraxerit  ab  omnibus  idololatriis  quibus  fuerant  dediti.  Praecessit  igitur  doctrina  quae  rectam  salutis  viam  ipsis  ostenderet,  et  ipsos  revocaret  a  superstitionibus.  Summa  est,  Deum  ubi  populum  illum  acquisivit,  simul  etiam  dedisse  pie  vivendi  regulam,  ne  huc  et  illuc  diverteret,  sed  haberet  scopum,  ad  quem  posset  dirigere  totum  vitae  suae  cursum.  Dixi  igitur  illis,  quisque.  Videtur  hoc  esse  magis  emphaticum,  quam  si  omnes  promiscue  et  generaliter  fuisset  alloquutus:  sed  debuit  familiaris  haec  invitatio  magis  penetrare  in  eorum  animos  quum  diceret  quisque,  ad  verbum  est  vir,  sed  perinde  est  ac  si  diceret,  quisque  vestrum  abiiciat  suas  abominationes,  et  ne  amplius  se  polluat  in  idolis  Aegypti.  Ubi  ergo  Deus  ita  sibi  eos  addixit,  simul  ostendit