32:476  salut,  c'est  a  dire,  pour  toute  son  Eglise.  D'avantage,  ne  sommes  nous  point  membres  de  l'Eglise?  ne  faisoit  on  point  la  guerre  a  nostre  chef  Iesus  Christ?  Quand  il  est  question  de  nostre  Capitaine,  de  nostre  Roy,  quand  il  est  question  de  sa  parolle  en  laquelle  consiste  tout  nostre  bien,  nostre  gloire,  nostre  felicite,  quand  on  persecute  noz  freres,  que  cela  ne  nous  attouche  point.  Encore  il  n'estoit  point  question  d'assaiflir  une  partie.  Mais  loue  soit  Dieu  que  nous  ne  l'avons  point  experimente.  Et  pourtant  nous  serions  bien  lasches  si  nous  dissimulions  maintenant,  si  nous  passions  un  tel  benefice  sans  faire  semblant  de  rien.  Comment  excuserions  nous  ceste  ingratitude  devant  Dieu?  quand  il  nous  seroit  propose  que  nos  avons  receu  nouvelles  de  ioye,  la  ou  nous  estions  en  crainte?  Ie  parle  bien  a  tous,  mais  principalement  a  ceux  qui  ont  quelque  iugement.  En  crainte,  dy-ie.  Non  point  que  nous  doutissions  du  soing  que  Dieu  a  pour  nostre  salut,  mais  estans  en  solicitude  d'invoquer  nostre  Dieu.  Nous  avons  sur  cela  receu  les  nouvelles  que  Dieu  a  confondu  les  entreprises  qu'on  faisoit  contre  nous,  voire  encore  sans  grande  effusion  de  sang,  dequoy  il  nous  faut  grandement  esiouyr.  Ce  malheureux  a  este  livre,  et  son  filz  par  les  siens  mesmes.  Nostre  Seigneur  n'a  point  permis  de  grande  violence,  afin  qu'on  cogneust  evidemment,  voicy  une  oeuvre  admirable  de  la  main  de  Dieu,  que  son  nom  soit  loue  eternellement.  Comment  donc  pourrions  nous  nous  excuser  devant  Dieu��  quand  il  nous  diroit:  n'est-ce  point  la  un  oeuvre  de  ma  bonte  que  i'ai  fait  pour  vous?  Quelle  reproche  mesme  nous  pourroyent  faire  les  iniques?  Ces  malheureux,  diroyent  ilz,  ont  eu  la  victoire,  et  au  lieu  qu'ilz  estoyent  en  grand  trouble,  ilz  sont  en  repos:  et  voila  ilz  ne  font  semblant  de  rien.  Ilz  sont  comme  des  pourceaux.  De  nous,  nous  eussions  fait  des  processions.  Ainsi  les  Papistes  nous  pourroyent  reprocher  nostre  vilenie.  Si  on  allegue,  ce  n'est  point  si  grande  chose,  c'est  une  fortune  de  guerre,  il  ne  la  faut  pas  tant  extoller.  Advisons  de  ne  point  supprimer  les  benedictions  de  Dieu.  Il  s'en  trouvera  bien  de  si  meschans,  qui  seroyent  contens  que  les  graces  de  Dieu  fussent  supprimees,  afin  que  son  ire  s'augmentast  de  plus  en  plus  contre  nous.  Or  ne  pensons  point  que  nostre  Seigneur  ne  s'en  vengeasse,  de  passer  un  tel  benefice  sans  protester,  et  recognoistre  que  nous  l'avons  receu  de  sa  main.  Une  autre  fois  il  pourroit  dire,  vous  n'estes  pas  dignes  que  ie  vous  face  du  bien.  Quand  tout  le  monde  s'estoit  esleve,  il  n'estoit  plus  question  de  se  tenir  a  aucunes  promesses  d'homme,  ou  il  n'y  avoit  nulle  tenue:  ny  a  la  foy  qu'ilz  avoyent  periuree.  On  vous  persecutoit  d'un  coste  a  guerre  ouverte,  d'autre  coste  par  pratiques:  voire  de  diverses  sortes,  les  unes  vilaines