40:474  tenemus  sensum  verborum,  iudicabisne  ipsos?  iudicabisne?  Repetitio  emphatica  est,  ut  magis  exprimat  Deus  pervicaciam  illius  desperati  populi.  Postea  addit,  Si  ita  fiat,  ergo  ostende  illis  abominationes  patrum  ipsorum.  Deus  hic  mitigat  illam  asperitatem,  qua  usus  fuit,  et  per  modum  correctionis  descendit  ad  rationem  illam,  nempe  ut  adhuc  semel  experiatur  sintne  sanabiles.  Si  ergo  iudicandi  sint,  hoc  est,  si  placeat  ingredi  in  aliquam  disputationem,  et  ipsos  coarguere,  exordium,  inquit,  facere  oportet  non  ab  ipsis,  sed  ab  ipsorum  patribus.  Vult  ergo  Deus  ipsos  iudicari  non  tantum  ob  paucorum  annorum  scelera,  sed  quia  antequam  nati  fuerint,  iam  patres  ipsorum  pertinaciter  defixi  fuerant  in  suis  abominationibus.  In  summa,  Deus  ostendit  ulcus  profundum  esse,  et  ideo  non  posse  curari,  nisi  probe  examinetur  occultum  virus,  quod  alioqui  putredinem  gigneret,  ex  qua  tandem  nasceretur  inflammatio.  Nam  multi  existimant  se  probe  defunctos  quum  leviter  pupugerint  vulnera.  Atqui  interdum  opus  est  usque  ad  intimas  partes  penetrare,  sicuti  hic  populus  non  tantum  leviter  vel  exiguo  tempore  provocaverat  iram  Dei,  sed  impietas  grassata  fuerat  iam  aliquot  saeculis,  et  scelera  quodammodo  haereditaria  illic  erant.  Quum  ergo  esset  occultum  virus,  nec  posset  facile,  aut  levi  remedio  curari,  ideo  iubet  Deus  exordium  fieri  ab  ipsorum  patribus.  Abominationes  ergo  patrum  ostende  illis.  Sequitur,  5.  Et  dices  illis,  Sic  dicit  dominator  Iehovah,  Die  quo  elegi  Israelem,  et  sustuli  manum  meam  ad  semen  domus  Iacob,  et  cognitus  fui  illis  in  terra  Aegypti,  et  sustuli  manum  meam  illis  dicendo,  Ego  Iehovah  Deus  vester:  6.  Die  illo  sustuli  manum  meam  ad  ipsos,  ut  educerem  eos  e  terra  Aegypti  in  terram  quam  prospexi  illis  fluentem  lacte  et  melle,  desiderium  (hoc  est,  quae  est  desiderium,  vel  quae  est  desiderabilis)  prae  omnibus  terris.  7.  Et  dixi  illis,  Quisque  spurcitias  oculorum  suorum  proiicite  et  in  idolis  (quanquam  significat  etiam  foeditatem,  vel  inquinamenta)  Aegypti  ne  polluamini:  ego  Iehovah  Deus  vester.  8.  Et  rebelles  fuerunt  mihi,  et  noluerunt  audire  me  (et  quae  sequuntur).  Confirmat  Deus  quod  nuper  dixi,  Iudaeos  scilicet  non  esse  obiurgandos,  quia  nuper  coeperint  peccare.  Neque  enim  satis  fuisset,  recentes  offensas  proferre  in  medium:  sed  iubet  Deus  incipere  a  patribus  :  quasi  diceret  ab  initio  gentem  illam  fuisse  perditam,  sicuti  illis  exprobrat  Stephanus,  Incircumcisi  corde,  vos  adhuc  resistitis  spiritui  sancto,  sicuti  semper  fecerunt  patres  vestri.  Et  Christus  similiter  prius  dixerat,  Implete  mensuram  patrum  vestrorum.  Scimus  etiam  quam  frequenter  occurrat  apud  pro-