37:474  Ieremias  quum  dicit  sermonem  Iehovae  sibi  fuisse  datum.  Prius  dixerat  verba,  vel  sermones  Ieremiae  filii  Helkiae:  poterat  quispiam  excipere,  imo  unus  quilibet  e  populo,  Quorsum  te  ipsum  ingeris?  quasi  vero  audiendus  sit  quispiam  mortalium  :  atqui  Deus  hoc  sibi  uni  vendicat.  Ergo  hic  Ieremias  quasi  per  modum  correctionis  subiicit  suos  esse  sermones,  non  quorum  ipse  sit  autor,  sed  minister  duntaxat.  Dicit  igitur  se  tantum  exsequi  quod  Deus  mandavit,  quia  fuerit  discipulus  ipsius  Dei,  antequam  doctoris  partes  sibi  sumeret.  Quantum  attinet  ad  initium,  et  finem  temporis,  causa  breviter  ostensa  fuit,  cur  dicat  se  fuisse  electum  prophetam  anno  13.  Iosiae,  et  se  perfunctum  fuisse  hoc  officio  usque  ad  undecimum  annum  Zedechiae.  Quod  autem  vocatur  Iosias  filius  Arnon,  dubium  est  an  vere  et  proprie  fuerit  filius  Arnon  Iosias.  Anno  enim  vicesimo  secundo  regnare  coepit  Arnon:  duobus  tantum  annis  regnavit,  Iosias  successit  in  eius  locum  natus  annos  octo.  Si  numeremus  praecise  annos,  et  genitus  fuerit  Iosias  anno  16,  hoc  videbitur  esse  absurdum,  quod  scilicet  Arnon  fuerit  pater  ante  annum  decimum  sextum.  Nam  oportuit  genitum  esse  anno  decimo  quinto.  Neque  enim  nasci  potuit,  nisi  post  menses  novem.  Ergo  decimo  quinto  genitus  fuisset  Iosias.  Hinc  colligitur  probabiliter,  filium  fuisse  lege,  non  autem  natura,  quemadmodum  postea  vocatur  Zedechias  filius  Iosiae,  quia  fuit  eius  successor,  quum  nepos  esset  ex  fratre,  ut  multi  existimant.  Sed  hoc  passim  satis  tritum  est,  vocari  regum  filios,  qui  successerunt  in  eorum  locum,  et  qui  erant  filii  ipsa  lege,  non  autem,  quemadmodum  dixi,  natura.  Nunc  sequitur,  4.  Et  fuit  sermo  Iehovae  ad  me  dicendo.  5.  Antequam  for  mar  em  te  in  utero  novi  te,  et  antequam  egressus  esses  e  vulva  sanctificavi  te,  Prophetam  in  gentibus  constitui  te.  Hic  fusius  prosequitur  Ieremias  quod  nuper  attigerat,  nempe  se  vocatum  fuisse  divinitus,  quia  aliter  temere  se  ingessisset.  Neque  enim  quisquam  usurpat  sibi  honorem,  ut  dicit  Apostolus:  sed  sola  Dei  vocatio  prophetas  et  doctores  in  sublime  erigit.  Ut  ergo  sibi  attentionem  conciliet  Ieremias,  pronuntiat  se  vocatum  fuisse  ad  munus  propheticum,  idque  clara  voce  Dei.  Hoc  consilio  dicit  sermonem  fuisse  datum:  Antequam  formarem  te  in  utero  novi  te.  Inducit  Deum  loquentem,  ut  sermo  sit  magis  emphaticus,  hoc  est,  ut  plus  habeat  ponderis  ac  vehementiae.  Nam  si  simpliciter  narraret  in  sua  persona  se  fuisse  Dei  voce  creatum  prophetam,  hoc  non  ita  afficeret  animos  auditorum,  sed  ubi  producit  loquentem  Deum,  necesse  est  in  hac  loquendi  forma  plus  esse  gravitatis  et  vehementiae.  Hic  praetereo  quod  posset  copiose  tractari,  nempe  vocationem