25:474  re  tamen  moerore  oppressus  animum  prope  despondet.  Neque  enim  cogitationem  illam,  quae  victos  sustentat  ac  recreat,  dubios  esse  bellorum  eventus,  admittere  patiebatur  Dei  promissio,  semper  fore  victores.  Quoniam  ergo  spei  non  respondet  successus,  quod  verum  erat,  statuit:  non  alia  de  causa  infeliciter  pugnasse,  nisi  quod  destituti  essent  promisso  Dei  auxilio.  Ergo  tam  ipse  quam  seniores  non  tantum  tristitiae  et  dolori  se  tradunt:  sed  suscipiunt  solennem  luctum,  ut  in  rebus  maxime  afflictis  fieri  solet,  scindendo  vestes,  et  pulverem  super  capita  spargendo.  Etsi  autem  ritus  iste  incredulis  quoque  usitatus  fuit  ad  testandum  dolorem,  specialis  tamen  fuit  ratio  piis  et  Dei  cultoribus,  ut  iram  eius  suppliciter  deprecarentur.  Ideo  in  vestium  scissura  et  aliis  continebatur  poenitentiae  professio:  quod  etiam  colligitur  ex  annexa  precatione:  quae  tamen  partim  ex  fide  et  sincero  pietatis  affectu,  partim  ex  immodica  perturbatione  mixta  est.  Quod  ad  Deum  recta  se  convertunt,  et  agnoscunt  in  manu  eius,  qua  inflictum  fuit  vulnus,  paratam  esse  medicinam,  ex  fide  manat  :  doloris  tamen  excessu  abrepti  metas  transsiliunt.  Hinc  expostulandi  libertas,  hinc  praeposterum  votum:  Utinam  libuisset  manere  in  deserto!  Neque  vero  novum  est,  ubi  sancto  zelo  ad  Deum  quaerendum  adspirant  piae  mentes,  lucem  fidei  obnubilari  affectuum  vehementia  et  impetu.  Hoc  autem  modo  vitiarentur  omnes  preces,  nisi  Deus  pro  immensa  indulgentia  ignosceret,  ac  maculis  abstersis,  eas  tanquam  puras  susciperet.  Et  tamen  quum  ita  libere  expostulando  reiiciant  curas  in  Deum,  simplicitas  haec  licet  venia  indigeat,  gratior  longe  est  quam  ficta  hypocritarum  modestia,  qui  sedulo  ne  qua  vox  confidentiae  testis  erumpat  se  cohibendo,  intus  contumacia  turgent  ac  crepant.  Excidit  a  moderatione  Iosue,  ubi  cum  Deo  litigat,  quod  populum  eduxerit  e  deserto:  ad  maiorem  vero  intemperiem  prosilit,  ubi  turbulentum  votum  Dei  promissioni  decretoque  opponit:  Utinam  e  deserto  nunquam  exiissemus!  Atqui  id  erat  Dei  foedus  abrogare.  Sed  quia  propositum  erat  tueri  atque  asserere  Dei  gloriam,  excusata  fuit  vehementia,  quae  merito  alioqui  Deum  provocasset.  Hinc  docemur,  sanctos,  dum  ad  rectum  scopum  contendunt,  saepe  impingere  et  labi:  idque  in  precibus  quoque  interdum  contingere,  ubi  maxime  fidei  puritatem  et  compositum  obedientiae  affectum  lucere  decebat.  Porro  Iosue  de  gloria  Dei  praecipue  fuisse  sollicitum  ex  proximo  versu  patet,  ubi  eius  patrocinium  quasi  sibi  iniunctum  suscipit.  Quid  dicam,  inquit,  ubi  obiectum  fuerit,  populum  terga  vertisse?  Ac  merito  conqueritur,  nihil  sibi  esse  quod  respondeat:  quia  Deus  testem  eum  ac  praeconem  suae  gratiae  creaverat,  unde  perpetuus  victoriarum  tenor  erat  sperandus.  Quum  ergo  magnifice  Dei  potentiam  pro  munere  sibi  divinitus  mandato  extulisset,  contrario