6:473  REFORMANDAE  ECCLESIAE.  rent,  pecudum  more  homines  per  omne  errorum  genus  in  exitium  ducerentur:  emersit  Lutherus,  exstiterunt  deinde  alii,  qui  coniunctis  studiis,  rationes  viasque  quaesierunt,  quibus  repurgari  a  tot  inquinamentis  religio,  pietatis  doctrina  restitui  in  suam  puritatem,  ecclesia  ex  tanta  calamitate  in  tolerabilem  aliquem  statum  colligi  posset.  In  hoc  cursu  adhuc  hodie  pergimus.  Et  quoniam  de  remediis,  quae  ad  istorum  malorum  correctionem  adhibuimus  dicturum  me  praefatus  sum,  de  ea  re  nunc  tractandi  locus  est:  non  ut  modum,  quo  progressi  sumus,  describam  (de  hoc  enim  postea  videbitur):  sed  ut  appareat,  non  alio  spectasse  nostra  studia,  nisi  ut  status  ecclesiae  ex  pessimo  saltem  aliquanto  melior  fieret.  Multis  et  atrocibus  multorum  calumniis  impetita  est  nostra  doctrina,  et  quotidie  impetitur.  Alii  fortiter  adversus  eam  declamitant  in  concionibus.  Alii  libris  editis  eam  vexant  ac  traducunt.  Ab  utrisque  plurima  congeruntur,  quibus  [pag.  31]  eam  infamari  posse  credunt  apud  imperitos.  Sed  exstat  in  hominum  manibus  fidei  nostrae  confessio,  quam  maiestati  tuae  obtulimus,  invictissime  Caesar:  quae  luculentum  nobis  testimonium  reddit,  quam  immerito  tot  odiosis  criminationibus  vexemur.  Et  hactenus  semper  ad  reddendam  doctrinae  nostrae  rationem  fuimus  parati:  ut  hodie  quoque  sumus.  Ne  multis:  nihil  auditur  in  ecclesiis  nostris  doctrinae,  quod  non  palam  profiteamur.  Quae  aliquid  habent  controversiae,  ea  perspicue  et  bona  fide  in  confessione  explicantur:  et  nihil  est  eorum,  quod  non  sit  a  nostris  hominibus  copiose  tractatum,  et  expositum  diligenter.  Inde  constare  iudicibus  non  iniquis  potest,  quam  procul  ab  omni  impietate  absimus.  Hoc  certe  aequis  iuxta  ac  iniquis  constat,  in  eo  non  parum  ecclesiae  profuisse  nostros  homines,  quod  et  mundum  quasi  ex  profundis  ignorantiae  tenebris  excitarunt  ad  scripturae  lectionem,  et  ad  sinceriorem  eius  intelligentiam  multum  contulerunt  operae,  et  locos  doctrinae  christianae  quosdam  utiles  cognitu  imprimis  feliciter  illustrarunt.  In  concionibus  nihil  fere,  praeter  aniles  fabulas,  aut  commenta  non  minus  inepta,  audiebatur.  Scholae  quaestionum  rixis  perstrepebant.  Scripturae  illic  rara  mentio.  Qui  ecclesiae  gubernacula  tenebant,  hoc  unum  habebant  curae,  ne  quid  quaestui  decederet.  Itaque  quidquid  erat  ad  farinas,  non  difficulter  patiebantur.  His  quidem  malis  non  nihil  emendationis  attulisse  nostros  homines,  etiam  iniquissimi  concedunt  :  utcunque  nostram  doctrinam  multis  postea  [pag.  32]  criminationibus  infament.  Verum  nihil  hoc  valere  ad  culpam  sublevandam  velim,  quod  multum  utilitatis  ex  nostris  laboribus  perceperit  ecclesia,  si  quid  alia  ex  parte  nocuerimus.  Excutiatur  ergo  tota  nostra  doctrina,  mos  in  administrandis  sacramentis  noster,  ecclesiae