25:473  473  COMMENTARIUS  IN  IOSUE  CAP.  VII.  474  deformitate  foedatum  est,  non  parum  infirmas  mentes  ea  res  turbare  potuit.  Verum  severa  correctione  deletum  fuit  quod  alioqui  conceptum  erat  scandalum.  Unde  colligimus,  ubi  improbis  maledicendi  occasio  data  est,  nullum  tollendis  ecclesiae  probris  aptius  esse  remedium,  quam  si  in  peccata  graviter  animadversum  fuerit.  2.  Porro  misit  Iosue.  Explorare  situm  urbis,  et  accessus  omnes  considerare  prudentiae  fuit:  ne  temere  per  ignota  loca  se  proiiciendo,  insidiis  circumvenirentur.  Sed  quum  necesse  esset  paulo  post  totis  copiis  longius  progredi:  exiguam  manum  praemittere  urbis  expugnandae  causa,  non  videtur  fuisse  solertiae  militaris.  Itaque  mirum  non  fuisset,  subita  eruptione  terreri  et  fugari  duo  vel  tria  millia  hominum.  Et  certe  multitudini  utile  erat,  viginti  aut  triginta  millia  ad  pabulandum  huc  et  illuc  spargi.  Adde  quod  in  strage  edenda,  quamvis  iugulum  sponte  praeberent  omnes,  satis  fuit  negotii  ad  fatigandos  paucos  homines.  Quod  ergo  repulsa  sunt  tria  millia  vel  circiter,  iusta  fuit  securitatis  ac  desidiae  merces.  Verum  paucitatem  non  fuisse  in  causa  cur  dissiparentur,  spiritus  sanctus  pronunciat,  ut  damni  culpa  illic  minime  quaerenda  sit.  Potius  factum  est  arcano  Dei  consilio,  quum  signum  irae  suae  ostendere  vellet,  ut  tamen  in  exiguo  numero  id  fieret  minore  iactura.  Et  certe  rarum  clementiae  specimen  fuit,  populum  leniter  et  sine  magna  clade  castigando,  expergefacere,  ut  malo  statim  remedium  quaereret.  Forte  etiam  non  ausi  fuissent  cives  Ai  impetum  facere  in  Israelitas,  si  iusto  exercitu  urbem  aggressi  forent.  Viam  itaque  patefecit  Deus  suo  iudicio:  quod  tamen  ita  mitigavit,  ut  tantum  detegeret  occultum  crimen,  quo  alioqui  tanquam  lenta  tabe  consumptus  fuisset  populus.  Quanquam  autem  mirum  non  fuit,  prosterni  Israelitas  qui  iniquo  loco  pugnabant  in  descensu:  palam  tamen  apparuit,  metu  et  defectione  animi,  antequam  manus  consererent,  fuisse  victos:  quia  terga  vertendo,  ex  loco  superiore  in  acclivem  vallem  cesserunt.  Quod  probrose  vero  contempti  fuerint  ab  hostibus,  ex  confidentia  et  strenuitate  patet,  quod  incitato  cursu  fugientes  persequi  non  dubitaverunt  versus  castra.  Accessit  trepidatio  in  castris,  quae  omnium  corda  liquefecit.  Fateor  quidem  fuisse  timendi  causam,  quia  hactenus  quasi  ludendo  tot  victorias  adepti,  se  turpiter  succubuisse  cernebant.  Magis  autem  nos  conturbant  res  insolitae.  Verum  coelesti  magis  terrore  fuerunt  perculsi,  quam  morte  triginta  hominum  et  trium  millium  fuga.  6.  Porro  Iosue  scidit.  Quanquam  cladis  vel  ignominiae  acceptae  causam  alio  reiicere  promptum  erat:  deinde  animosum  ducem  minime  decebat  tantopere  deiici  triginta  hominibus  amissis:  praesertim  quum  auctis  in  centuplum  copiis  hostes  ab  itinere  adhuc  lassos  frangere  non  difficile  esset:  non  abs