5:472  obedientiae  iugo  non  reformatum  summum  pontificem,  sed  nullum,  non  remotos  abusus  a  sede  apostolica,  sed  sedem  ipsam  destructam  [fol.  9]  velle.  Summum  quidem  pontificem  vel  principem  sacerdotum  vocari  sacri  canones  vetant,  nec  aliud  concedunt  romano  episcopo,  quam  ut  vocetur  primae  sedis  episcopus.  Nimirum  sancti  viri  qui  Tioc  sanciebant  usu  ipso  edocti  erant,  non  posse  unum  hominem  tanto  oneri  parem  esse  ut  totius  ecclesiae  vel  gubernationem,  vel  praefecturam,  vel  inspectionem  sibi  sumeret.  Sed  utinam  vel  Romae  vel  Eugubii  esset  qui  omnium  ecclesiarum  paternam  pastoralemque  curam  ac  sollicitudinem  quum  paulo  susciperet,  simul  ac  sustineret.  1)  Nam  qui  sic  foret  comparatus  ut  potestate  sua  in  aedificationem,  non  ruinam  uteretur,  ita  reliquis  episcopis  ad  implendam  suam  functionem  adiumento,  non  impedimento  esset  :  tunc  certe  re  ipsa  declararent  protestantes,  se  non  cupere  nullum  pontificem  sed  magis  reformatum,  ac  vere  summum,  qui  nunc  omnino  nullus  est;  sedem  apostolicam  se  cupere  non  destructam,  sed  bene  restitutam,  quae  mille  inquinamentis  conspurcata  et  profanata,  a  sanctis  apostolis  ad  Satanam  translata  est.  Idque  adeo  iam  patefactum  mundo  esset,  si  tyrannis  romana,  quae  solis  tenebris  fundata  est  et  firmata,  non  obstaret,  quominus  pii  conventus  aliquoties  iam  a  protestantibus  habiti  in  luce  atque  oculis  hominum  versarentur.  Contra  vero  si  excutere  liceret,  quae  pontificii  conventicula  his  viginti  annis  aut  amplius  ad  opprimendum  evangelium  habuerunt,  non  esset  obscurum  quam  reformationem  vel  cogitent  vel  ferre  queant.  Neque  tamen  sic  latent  eorum  nequitiae,  quin  palam  sit  gravibus  ac  sanis,  eos  non  aliquem  vel  summum  vel  infimum  episcopatum  appetere,  sed  everso  sublatoque  episcopali  munere  sub  eius  nomine  tyrannidem  prorsus  antichristianam  stabilire.  Sedem  vero  apostolicam,  utrum  salvam  cupiant  nec  ne,  satis  claro  argumento  est,  quod  doctrinam  a  sanctis  apostolis  traditam  non  solum  ipsi  non  docent,  aut  docendam  saltem  curant,  sed  sceleratis  impiisque  mendaciis  miseras  hominum  mentes  dementant,  ac  conscientias  perdunt,  rectam  ac  salutarem  disciplinam  non  modo  nullam  exercent,  sed  innumeris  libidinum  exemplis  totum  mundum  corrumpunt.  Denique  non  aliam  habent  doctrinam,  nisi  qua  animas  in  exitium  praecipitent,  non  aliam  disciplinae  speciem,  nisi  tyrannicam  vel  potius  carnificum  saevitiam;  neque  his  maleficiis  contenti,  totis  animis  huc  incumbunt,  quo  vexentur,  exterminentur  denique,  e  medio  tollantur  quicunque  puriorem  Christi  doctrinam  legitimumque  ecclesiae  ordinem  vel  asserere  conantur,  vel  admittunt,  vel  defendunt,  vel  etiam  requirere  audent.  1)  Haec  satis  obscure  dicta  sunt  neque  affirmare  ausimus  textum  omni  ea  parte  sanum  esse.