35:472  mais  convenablement,  disent-ils,  pource  qu'il  est  convenable  et  decent,  que  l'homme  se  presente  et  dispose  pour  recevoir  la  grace  de  Dieu.  Or  n'estce  pas  notamment  dementir  le  sainct  Esprit?  Voici  une  sentence  assez  claire,  il  n'y  faut  point  de  glose.  Qui  est-ce  qui  m'a  prevenu  ?  dit  le  Seigneur.  Notons  bien  donc  qu'ici  Dieu  despouille  tout  le  genre  humain  de  ceste  fausse  opinion  et  diabolique  dont  les  hommes  sont  tant  enyvrez:  en  disant  qu'il  n'est  point  tenu  a  nous,  et  que  nous  tenons  tout  de  luy:  que  nous  ne  luy  pouvons  rien  apporter,  qu'il  ne  recoit  nulle  recompense  de  nos  services  que  nous  luy  ayons  faits:  comme  aussi  il  n'a  nul  besoin  de  nous.  Maintenant  en  somme  nous  voyons,  qu'ici  toute  sagesse  et  toute  iustice  du  genre  humain  est  abbatue  et  aneantie.  Car  il  y  a  deux  choses  qui  nous  font  eslever  contre  Dieu:  c'est  d'un  coste  quand  nous  cuidons  estre  sages  par  trop:  et  puis,  quand  nous  voulons  aussi  avoir  quelque  iustice  en  nous,  et  quelque  dignite.  Or  d'une  part  Dieu  nous  monstre,  que  nous  aurons  beau  cacqueter  et  gazouiller:  qu'en  la  fin  il  nous  fera  bien  taire.  Pourquoy?  Quel  titre  avons  nous  contre  luy?  Apprenons  donc  de  n'estre  point  sages,  mais  plustost  sobres,  et  nous  humilier:  que  nous  cognoissions  les  oeuvres  de  Dieu  entant  qu'il  nous  les  manifeste,  et  puis  que  nous  ayons  ceste  bride  de  nous  retenir,  et  ne  passer  point  outre  ce  qui  nous  est  monstre  en  l'Escriture  saincte.  Quand  nous  en  serons  ainsi,  nous  serons  tousiours  guidez  par  le  sainct  Esprit.  Ainsi  donc  gardons  de  dire,  O  ie  veux  savoir  pourquoy  cela  se  fait:  ne  faisons  point  des  sages,  pour  nous  enquerir  de  ce  que  bon  nous  semble,  quand  il  nous  doit  estre  incognu:  mais  contentons  nous  de  ce  qui  nous  est  manifeste  en  l'Escriture:  et  sur  tout  de  ce  qui  nous  peut  edifier  en  foy  et  en  la  crainte  de  Dieu.  Et  quand  nous  verrons  quelque  chose  qui  nous  semblera  estrange:  si  nous  cognoissons,  Dieu  l'a  ainsi  prononce,  il  le  faut  recevoir  sans  contredit.  Mais  au  reste,  quand  Dieu  nous  laissera  la,  ne  nous  disant  point  la  chose,  il  nous  faut  retenir  tout  court,  et  ne  passer  point  outre:  et  ne  faut  point  que  nous  vueillions  estre  subtils  a  nostre  phantasie.  Voila  donc  pour  un  Item,  Qu'il  faut  que  nostre  bouche  soit  bridee,  pour  souffrir  d'estre  escoliers  de  nostre  Dieu,  puis  qu'il  nous  fait  cest  honneur  de  nous  enseigner  tant  de  sa  bouche,  que  de  son  sainct  Esprit.  Or  il  y  a  pour  le  second  la  iustice:  qu'estans  convaincus  que  nous  n'avons  aucune  dignite  qui  soit,  mais  quand  nous  aurons  beaucoup  travaille,  que  nous  ne  pouvons  rien  apporter  a  nostre  Dieu:  nous  passions  condamnation.  Mais  il  y  a  bien  pis,  c'est  que  tant  s'en  faut  que  les  hommes  s'appliquent  a  bien  faire:  qu'ils  employeront