25:472  1.  Transgressi  sunt.  Refertur  unius  hominis  crimen,  et  quidem  clandestinum,  cuius  culpa  in  totum  populum  transscribitur  :  neque  id  modo,  sed  in  plures  insontes  simul  reiicitur  poena.  Atqui  minime  consentaneum  videtur,  privato  et  occulto  scelere  totum  populum,  qui  conscius  non  erat,  damnari.  Respondeo,  non  esse  novum,  ut  in  totum  corpus  redundet  unius  membri  peccatum.  Si  ratio  nos  lateret,  satis  superque  nobis  esse  debet,  transgressionem  imputari  filiis  Israel,  dum  ad  unum  hominem  noxa  restringitur.  Verum  quia  ut  plurimum  contingit,  connivendo  etiam  non  malos  alere  fratrum  peccata,  pars  culpae  merito  reiicitur  in  eos  omnes,  quos  dissimulatio  societate  implicat.  Hac  ratione  Paulus  Corinthiis  omnibus  exprobrat  privatum  unius  hominis  flagitium,  et  in  eorum  fastum  invehitur,  quod  tanta  ignominia  foedati  adhuc  gloriari  audeant  (1.  Cor.  5,  4  sq.).  Verum  hic  excipere  promptum  est,  furtum  omnes  latuisse:  ideoque  non  esse  locum  proverbio,  eum  perpetrare  crimen,  qui  dum  impedire  potest,  nihilominus  fieri  patitur.  Fateor  certe,  non  liquere  cur  toti  populo  imputetur  privatum  crimen,  nisi  quod  forte  non  satis  diligenter  ante  animadverterant  in  maleficia:  unde  fieri  potuit,  ut  hic  miser  audacior  fuerit  ad  peccandum.  Et  certe  furtim  obrepunt  ac  pullulant  malae  herbae  fructusque  noxios  producunt,  nisi  cito  revulsae  fuerint.  Quanquam  ratio  cur  Deus  totum  populum  reum  faciat  occulti  furti,  altior  est  ac  magis  recondita:  quia  magis  insolito  documento  voluit  in  posterum  admonitos,  unius  scelere  posse  omnes  fieri  reos,  quo  diligentius  ad  cavenda  vitia  attenderent.  Nihil  ergo  melius,  quam  suspensas  tenere  nostras  mentes,  donec  libri  aperiantur,  ubi  clare  patebunt  quae  nunc  nostra  caligine  obtenebrantur  Dei  iudicia.  Sufficiat  nobis,  privata  labe  infectum  fuisse  totum  populum:  quia  sic  pronunciavit  summus  Iudex,  coram  quo  nunc  obmutescere,  sicuti  ad  eius  tribunal  semel  nos  sisti  oportet.  Refertur  ex  qua  stirpe  fuerit  progenitus  Achan,  augendae  et  quasi  propagandae  ignominiae  causa:  ac  si  diceretur,  familiae  suae  et  totius  gentis  fuisse  probrum.  Nam  scriptor  historiae  ad  tribum  usque  Iuda  ascendit.  Quo  docemur,  ubi  quispiam  ex  nostris  turpiter  et  scelerate  se  gerit,  quodammodo  in  eius  persona  verecundiae  notam  nobis  inuri,  ut  humiliemur,  non  quod  propinquis  omnibus  scelerati  hominis  insultare  aequum  sit:  sed  ut  diligentius  incumbant  omnes  consanguinei  ad  mutuas  correctiones  :  deinde  vel  suam  conniventiam,  vel  propria  delicta  puniri  agnoscant.  Iam  scandali  maior  obiecta  fuit  occasio  ad  omnes  turbandos,  quod  in  tribu  Iuda,  quae  flos  et  decus  erat  totius  gentis,  deprehensum  fuit  tale  facinus.  Et  certe  admirabili  Dei  consilio  factum  est,  ut  resideret  in  illa  tribu  praerogativa,  quae  spem  futuri  regni  foveret.  Atqui  ubi  inter  principia  decus  hoc  ob  unius  hominis  culpam